Unas semanas atras topi un haber luzyo ke agora va partajar kon vozotros. Komo savesh, en los ultimos anyos la direksyon jeneral de fondasyones (Vakıflar Genel Müdürlüğü) de la Turkiya empeso a restorar varios kales viejos i arruinados esparsidos por el payiz. El mas famoso fue sin duda el Kal Grande de Andirne ke es uno de los kales mas ermozos i grandiozos en la rejion entera. Mas resientmente, meldi el haber de Silvyo Ovadya aki en el Şalom, ke la sinagoga vieja de Kilis (ke ya estava abandonada desde mas de medyo siglo) tambien fue restorada. Ama no reushi a topar munchas informasyones o fotografiyas del kal despues de su renovasyon para esta eskrita. Entonses embiyi unos mensajes a la ofisina de turizmo lokal de Kilis i eyos muy amablemente me embiyaron estas fotos.
Meldando sovre los djudios de Kilis, me ambezi un alay de kozas ke no saviya antes. Por egzemplo, la komunidad djudia de Kilis era mizrahi. Era una komunidad de arabo-avlantes konektado al rabinato de Halep, ke oy es una de las sivdades ke sufriyo mas achakes de la gerra en la Siria. La grande parte de estos djudios eran merkadores ke vendian kozas komo shavon, lavorando sovre las rutas komersiyales entre Antep i Halep. Estos djudios fraguaron sus kal en Kilis en el siglo 19. Este kal serviya la komunidad de 300 famiyas djudias ke eran establesidos en Kilis. Una koza interesante ke meldi es ke los kales mizrahis tienen elementos arkitekturales ke son bastantes distinktos de los kales de Turkiya ke son sefaradi o ashkenazi. Por egzemplo, el ehal de los kales mizrahis (komo en Kilis, Antakya, i Antep) se topan en la pared del sur al lugar de la pared oriental de la sinagoga.
El kal de Kilis fue utilizada asta el anyo 1958, kuando los ultimos miembros de la keila se fueron. La mayor parte izo aliya, ama una parte tambien se establesiyo en otros payizes komo los Estados Unidos. Me plaziya muncho saver si algunos de los djudios de Kilis fueron a Estambol o si algunos de sus desendientes se kedaron en la Turkiya. Porke la restorasyon de este kal deve ser muy emosyonate espesyalmente para eyos, los ke tienen raizes en Kilis, kon antepasados ke izieron sus orasyones en este kal durante anyos i anyos. De kualkier manera i malgrado las intensiyones detras de la restorasyon, es bueno saver ke estos lugares ke teniyan riziko grande de ser pedridos kompletamante van a ser salvados. Ansina, djente (turistos o rezidentes lokales) ke pasan por este kal se van a akodrar de la istoria multikultural de Kilis. I kisas, ansina eyos se demandaran a eyos mizmos lo ke afito a los djudios de Kilis.
