İsak Eskinazi
El anyo 1827. La sivdad de Magdeburg de Alemanya.
En este anyo nasyo Ludwig Carl Friedrich Dedloid. Engrandesyendose se ambezo lo ke son los pletos entre su madre i su padre, i tuvo una chikes muy trublada. Los paryentes ke amavan a Carl lo metyeron en un orfelinato para alesharlo de estos sufrimyentos.
Carl se kedo aya asta los 12 anyos. Aki tambien lo maltrataron i lo aharvavan sin tener kuento de pedagojiya nesesarya. Carl desidyo de fuyirse i una noche se fuyo i yego a Hamburgo. En Hamburgo topa un lavoro en uno de los barkos komersyales. Despues de 4 mezes en la mar, el barko pasa por el Bosfor... Carl mirando a la mar ve de leshos La Torre de Leandros (Kız Kulesi). Kuando el barko se aserka de la torre, Carl salta a la mar i nada de toda sus fuersas a la torre. En akel tyempo la torre serviya a enserrar los Leprozos. Apanyan a Carl i lo yevan al lado de Emin Ali Pasha. El Pasha le demanda: porke te fuyites del barko? Carl le responde: me estavan aharvando i muy mal tratando. El Pasha le demanda otra vez: aze 4 mezes ke estas en la mar, porke Estanbol? El ijiko le mostra la torre i dize: por modo de esta torre. Me plazyo muncho esta torre.
Klaro ke el haber ke el chiko se echo a la mar en el Bosfor yego a Alemanya i eyos demandan a Emin Ali Pasha de mandar atras a Carl. Ali Emin Pasha deside de no render al chiko i se aze protektor de Carl… El Pasha troka el nombre de Carl i lo yama Mehmet Ali. Mehmet Ali estudya i se aze militar asta el grado de Pasha. Tiene una karera yena de bravura i reprezenta el Imperyo Otomano en munchos kavzos importantes. Se kaza i tyene 4 ijas. Una de eyas se yama Leyla Hanım. Leyla Hanım tuvo una ija ke se yamo Celile. Celile es la madre de NAZIM HİKMET.
Ay ke saver ke Nazım Hikmet fue el bisinyeto de Ludwig Carl; Mehmet Ali Pasha.
El 3 de Junyo era diya de komemorasyon de la muerte de Nazım Hikmet... Esta istorya tyene otra kontinuasyon.
Nazım Hikmet nasyo en Salonika. Savemos ke Nazım Hikmet entro a la prizyon en 1938. La razon era meldar una poeziya ke fue eskrita por uno se sus amigos, Ömer Deniz, de la eskola militar. Un diya los dos fueron al sine. Salyendo del sine, su amigo Ömer le pidyo a Nazım ke melde la poeziya ke eskrivyo. Esto fue la razon ke los 2 entraron al prezo. Despues de 7 anyos Ömer salyo del prezo i desidyo de estudyar el derecho para azerse avokato. Komo no teniya paras, avyo una butika chika en Fatih para azer djugetes de tavla. Kon el revenido pagava sus estudyos i biviya de esta manera.
Un diya, un ijiko de 7/8 anyos entra a la butika de Ömer i le demanda si puediya lavorar al lado de el. Ömer se apiyada del ijiko i aksepta ke lavore a su lado. Un diya el ijiko pidyo de Ömer ke le aga unos kuantos djugetes i kuklitas. (Maryonetas). El ijiko se yeva las maryonetas a su eskola i aze una prezentasyon a sus amigos.
Este ijiko se yama MÜJDAT GEZEN.
La vida es una romansa de miles de ojas i una muzika interminable ke mos toka profundamente el korason..
