Ay kaji tres mezes ke estamos enkarselados en muestras kazas a kavza de este virus “Corona” ke ya mos kito la gana de bivir. Las personas keren sosyalizarsen, avlar kon una amiga, bever un kafiko, kaminar en el bodre de la mar para tomar un poko de aver limpyo i respirar el oksijen…
No esta abastando solo avlar kon telefono, kale estar uno en frente de otro, mirar a los ojos ver la ekspresyon del den frente kuando estamos avlando i munchas otras kozas….
Enfin, en estos tres mezes mozotros los ke tenemos de 60 anyos para ariva, no kero dizir aedados porke no lo semos, mos izimos veramente muy muy teknolojikos. Estamos koryendo de detras los mansevos ke no tyenen pasensya ni de avlar, para ambezarmos kozas muevas en el kompyuter.
Agora lo ke es moderno es el “ZOOM” ke se esta entrando kon un numero i se esta puedyendo ver 25 personas en una pajina i mas de 100 personas en todo.
Deke ampeso el zoom, dia i noche estamos en el zoom para sosyalizarmos.
Todo se esta azyendo en el Zoom. Fashaduras, vijolas, bar-mitsvas, tefillines, meldados, kazamyentos, divorsos i mas i mas…
A parte de esto, avlas kulturales, reunyones de organizasyones, no solamente en Estambol, estamos puedyendo avlar kon las kuatro partes del mundo entero. Siguramente ke mos esta plazyendo i el tyempo esta pasando.
Vos kero kontar agora el komporto de las personas. Antes tres semanas aviya tres kuatro meldados de diferentes personas ke se muryeron (z"l), mansevos komo mas aedados.
En estos meldados ay un haham ke esta orasyonando, las famiyas tristes siguramente i los ke keren asistir para azer una onor.
Keridos Lektores komo mos vamos a una sinagoga? Me puedesh dizir… Mos vistimos una bluza i una fusta, mos penyamos i yegamos kon un hen.
Aki el haham esta meldando, echando ashkava, los partisipantes ken kon atlet esta asistyendo, ken komyendo por la noche enfrente de todos, porke tyenen ambre, no pueden asperar 20 minutos, ken komyendo pipitas, ken bevyendo, ken avlando kon telefon arimado kuando todos estan en pyes, ken esta orasyonando kon un bruido ke no se esta oyendo i mas i mas…
Kualo es este komporto? Mi idea es, ke estas personas son muy impertinentes en frente de estas famiyas tristes ke peryeron un kerido… Semos liberos de asistir u de no asistir… Si keremos komer asistimos otra noche, komo benadam vistidos kon una kamiza u una bluza, no emporta. Kale dar el respekto menesterozo al den frente i en primero a si mizmo. Veramente me sorprendi de esto todo i kije partajarlo kon vozotros.
Kedavos en la buena ora en vuestras kazas sanos i rezyos, sin korona i kon felisidad en esperando ke todo va pasar i va ser bueno…
