Los gustos i las golores de las komidas sefaradis es una de las kozas ke me konektan a la kultura Djudia. Komo saveshtenemos una memoria de golor muy fuerte. Mos akodramos las golores importantes después de munchos anyos. Es por esto ke kando mi padre gizo bugulama de gaya la semana pasada ya torni a las mezas de mi chikes. Komo munchas famiyas djudias las noches de Shabat eran por seguro la sena la más importante de la semana. Kuando mi granmama Flor bivia, se preparava una meza de Shabat de chupar los dedos. Su kuzina sefaradi era enrikesido kon la kultura muy rika de Chanakkale ke era muy orguyosa de apartener. Flor, ke era una mujer atada a la tradisión muy fuerte kada semana resivia el día de Shabat komo una novya, komo se dize en Leha Dodi.
Flor empasava a avlar i planear lo ke se va gizar por la noche de Shabat del diya de Alhad. I ke mankava de estas mezas de alegría? Borekas de ispinaka, filikas, arroz, gayina, berendjena, bizelya, tres tipos de salatas azian siempre parte de su gizado más savrozo ke konosi en mi vida.
Naturalmente el pishkado era la komida reina de la meza. En el gizado sefaradi, el pishkado es el semból de la rikeza de la meza. Komo komemos la kavesa de pishkado en Rosh HaShana. De todas las komidas de pishkados, Gaya kon avramila era mi preferida durante los enveranos en Burgaz. Gaya kon avramila i sofrito (armi de tomat) son muy savrozo endjuntos.
Komo saven munchos, Gaya (o gelincik en Turko) es un pishkado muy savrozo ke bive debasho de las rokas. Ya uvo un tiempo ke se topava muncho en la mar Marmara. Por esto se dize ke kuando nuestros padres yegaron de Espanya kon mil difikulta, komieron Gaya ke se topava muncho i ke era mas barato. Komo todos los pishkados en Marmara agora esmas difísil de topar.
Las mezas de Shabat eran siempre mezas de alegria por la famiya. Se diskutava de todo. I kuando yo no komiya bueno,mi grandmama diziya, la gana ke tiene él de komer, yo tengo de baylar. Tal vez me akodro ke los grandes avlavan sovre un vapor de İzmir. Tantas vezes les demandi, ke tenemos de azer konel vapor de Izmir i mis parientes se riyiyan. Despues de tantos anyos finalmente empesi a entender ke kuando kerian avlar de mi o de mi ermano en la meza sin ke yo entienda, diziyan “el vapor de Izmir” para no dizir muestros nombres.
El vapor de Izmir de esta gazeta, me kito punto porke eskrivi la otra vez ke el no entiende mucho el Judezmo. Me espanti muncho ke no me va deshar eskrivir mas pero me alegri muncho kuando Silviyo Ovadia me apoyo i metyo mi foto en su artikolo. Ademas i me yamo mansevo a 42 anos... Ke maraviya! Kero rengrasyar a Karen, Ivo i Silvyo por enkorajarme a eskrivir en muestra lingua tan ermoza.
