La semana pasada vos konti sovre lo ke me ambezi de la traduksyon de un livro de komida. Ke no vos pareska ke, lo ke vos eskrivi es todo lo ke me ambezi. Lavorando i meldando se puede ambezar kada diya kozas muevas. La semana pasada diya de vyernes resivi un whatsapp de mi mujer ande me estava enformando ke muestro amigo Mois Gabay devia de dar una konferensia sovre los Camondos diya de Shabat i la ke le embiyo era una mujer ke no azia parte de muestra komunitad. Esta vez fui dos vezes kontente. Ya se ke Mois avlo muncho kon la organizasion para no azer este evenimyento diya de shabat; ma no achetaron. Komo las sinagogas no estavan avyertas dishe ke ya puedo segir este program. Ya konosko munchas kozas sovre los Camondos. Ma savesh ke no ay fin para ambezar kozas muevas. Kije asistir a este program para ver la reaksyon de los partisipantes i sus entereso a este modo de sujetos. Kon esta Korona mos ambezimos ke devemos de organizar diferentes aktivitades para no pedrer el entereso i el raporto kon los enteresados. Reelmente en 90 puntos, Mois reusho a dar munchos detalyos sovre esta famiya ke fueron una de las mas grandes Kazas de Banka en el Imperio Otomano. A parte de esto ayudaron muncho la Sivdad de Estanbol para ke se forme una Munisipalidad. I el Sejen Kuarter, Altıncı Daire, ke es mismo oy en diya el Sentro de la Munisipalitad de Beyoğlu/Pera fue fondada por los miembros de esta famiya. El metro, los vapores i todo modo de medyo de transportasyon kon sus organizasyones fueron kreados por los Camondos. Eyos fueron los primeros a fraguar apartamentos i hanes en diferentes foburgos de Estanbol: en Galata, Karaköy, Tünel, Bankalar Caddesi, Eminönü … I alkilavan estos edifisios.
Los Camondos son los fondadores del Kal de los Frankos, del Kal de Yeniköy ke se topava djusto enfrente de sus villas ke se topava ensima de la mar. Para los ke no saven, sus kazas es empleada oy en diya komo departamento del Servisio Militaryo (Askerlik Şubesi) de este kuarter. I todos no lo saven ma el Kal de Büyük Çorapçı Han fue fraguado porke los Djudios Rusos ke fueron refujiados en estas tyerras se kedavan en los hanes de Eminönü i no teniyan lugar para las orasyones. I el Sinyor Camondo les ayudo materyalmente para formar esta Sinagoga ke es dainda avyerta i se aze kada diya la Minha i syertos diyas la orasyon de la demanyana; el Shahrit. Ya se ke anyos antes se realisava mismo la tefila de Shabat. Ma ay munchos anyos ke la desharon a los Sirkedjilis.
Mois konto la vida de los Camondos en Paris eskapo kon Auchwitz, ande la famiya se desparesyo. Reelmente Mois tuvo un grande sukseso kon esta avla. Esta semana les konto sovre los Djudios Turkanos i sus istoria en la epoka de la Republika.
Espero para muestro Museo ke vamos a pueder organisar syertas aktivitades kon Mois Gabay i va ser un grande sukseso para el i para el Museo.
