La maale de Alfama es una de las maales mas viejas en la sivdad de Lisboa. Sus kalejas largas i serpeantes fueron la shena de munchos eventos importantes durante siglos i siglos de istoria. Fue en Alfama ke, asta la eskpulsyon i enkizisyon, munchos de los djudios de Lisboa bivian. Ansina, Alfama es konosida komo la djuderia vieja de la sivdad. Reelmente kuando vash kaminando por las kalejas de Alfama, puedesh imajinar el periodo kuando djudios biviyan aya.
Oy, una kaye en esta maale dainda se yama “Rua da Judiaria” (Kaye de la Djuderia). Aki ay un sentro kultural djudio chikitiko ke organiza eventos i topaduras. En una plaza en Alfama tambien ay planos de fraguar un muzeo djudio. Si me demandash a mi, es una grande verguenza ke una de las kapitalas de Evropa kon una istoria djudia tan profunda dainda no tyene un muzeo djudio. Sin duda manka en Lisboa un punto ande la djente puede ambezarse sovre la istoria, las tradisyones, i la kultura de los djudios de Portugal - i no solo los sefaradim ke fueron ekspulsados, ama tambien todos los ke fueron forsados a konvertirsen al kristiyanizmo, los Ashkenazim ke vinieron en el siglo 20, i los konversos ke tornaron al djudaizmo en el siglo dalkavo. Yo puedo dezir de vedra ke komo alguno non-djudio me ambezi muncho en muzeos djudios esparsidos por Evropa. Fue en el muzeo djudio de Estambol ke meldi en Ladino por la primera vez. El enverano pasado en Bukarest i Odessa tuve el mazal de avlar kon miembros viejos de las keillas i ambezarme sovre Yiddish en los muzeos djudios. Entonses yo me konsidero testigo a la emportansya de estos lokales.
Mas un elemento kultural famozo ke tyene sus orijen en Alfama es el jenero muzikal portugez tradisyonal ke se yama fado. Estos diyas fado se esta aziendo mas i mas popular en el mundo entero i no solamente en komunidades portugez-avlantes. Tambien en la Turkiya ay muncha djente ke me dize ke les plaze muncho oyir Fado. A mi tambien me plaze muncho oyir a kantikas de Fado, unas tristes i yenas de emosyon, otras alegres i sovre amor, i munchas sovre la sivdad de Lisboa i la maale de Alfama. Una koza sovre el fado ke tambien munchos portugezes no saven es ke el kompozitor i eskrivano de la reyna de fado Amalia Rodrigues era un ombre djudio. El se yamava Alain Oulman i era un djudio portugez kon raizes fransezes. Endjunto kon Amalia Rodrigues los dos kreyaron kantikas maraviyozas i majikales. El otro diya pensi, ke bueno seriya si el futuro muzeo djudio de Lisboa teniya el nombre de Alain Oulman. Ansina el futuro muzeo kombinariya dos elementos distintos, ma kompletamenre unikos i integrales de Alfama en un solo lokal.
