İsak Eskinazi
Aze anyos pasi un tiempo en el este de Turkiya i las fines de semanas me iva a las sivdades serkanas komo Mardin.
Aya aviya muncha djente ke yamavamos Suryanis. Aze un rato, muestro amigo Silvyo mos konto la inogurasyon de una iglezya Suryani en Estanbol. Ken son estos Suryanis ke azen sus orasyones en Arameo, komo el Kadish muestro?
Ay ke saver ke la lingua aramea se avlava tan bien por los Arameos i los Ebreos. Agora, ken son los Arameos? Los Arameos eran un puevlo semitiko ke biviyan en Harran, (payis de Avraham Avinu, i de Yaakov Avinu) basho la dominasyon de los Asiryos.
Sea en el templo de Amenofis IV o sea en las tablias de los Hititas se avla de los Arameos komo los ‘Habirus’, ke eran Semitikos. La lingua ke avlavan era una lingua semitika.
El Rey Asiryo Tiglat Palaser diziya: “2 vezes al anyo pasi el rio Eufrates, vensi a los puevlos de aya i trushe a mi payis todo lo ke estava aya”. Los puevlos de aya eran los Arameos.
En las letras de “Tel El Amarna” (Sivdad ensima del Rio Nilo) ande bivyo el famozo paro Akhenaton, ke formo una forma de relijyon monoteista, dize ke los Habirus eran los Arameos i los Ebreos.
El Arameo se avlo en una jeografia bastante ancha, komo Anatolya, Sirya, Mezopotamya, inkluzo Iran de oy. Los eskritos mas viejos son de “Hazael”, ke bivyo en los anyos 800 antes de muestra era.
Uvo una epoka de pas entre los Arameos i el Reynado de Yeuda. Ama kuando el Rey Ahab muryo i la paz se eskapo.
Es ke kada ves ke los Asiryos keriyan konkistar las tierras de los Djudyos i de los Arameos, estos 2 puevlos se uniyan. Despues ke el peligro de los Asiryos pasava, kombatiyan de muevo entre eyos.
La lingua de los Arameos pertenese a la mizma famiya ke el Ebreo i el Fenisyo. Es dizir ke estas linguas son Semitikas. Por esto, siertas orasyones muestras son en Arameo i no en Ebreo. Ama tenyendo mizma rayis no es muy difisil de entender lo ke diziyan. Inkluzo los Asiryos eskrivyeron en esta lingua.
En Tel-Dan (El norte de Israel-Dan-Dafne-Metula) esta la piedra ke yamamos la Stela ande el Rey Hazael eskrivyo en Arameo.
El livro de Ezra i el livro de Yov estan eskritos en Arameo. Se dize ke i Yeoshua (Isa) avlava el Arameo.
Los Arameos bivyeron en diferentes paizes. Los ke se estableseron en Sirya, tomaron el nombre de Suryanis i se izyeron Hristiyanos. Ay Suryanis ke dependen de la iglezya se Urfa, los yaman Suryanis del Este, o Nasturis.
Ay tanbien Suryanis ke dependen de la iglezya de Antakya, i los yaman Suryanis del Oeste, o Suryanis Arameos. Komo Yeoshua (Kristo) avlava el arameo, se dize ke son los primeros kristyanos del mundo, o los primeros ke desidyeron de konvertirsen al Kristyanizmo. Oy estan mas i mas en Mardin i Turabdin. El monasteryo de “Dar-ül –Zaferan”, (la kaza de Safran) es muy famoza. Otros monasteryos komo Mor Gabriel, el monasteryo de los Kuarenta, el monasteryo de Mar Kiryako son los mas konosidos.
Kon los evenimientos del terorizmo, munchos Suryanis desidyeron de bivir en otros payizes komo Sueka i otros payizes vizinos.
