Klarika, tu, la infatigavle, uzavas dizir:
“Personne n’est irremplaçable”...
Si, realmente, te regretamos...
Tambien te rengrasiamos - tuvites la inspirasion de pensar a Karen Şarhon para enkavesarmos. En el Şalom, la pajina de Judeo-Espanyol se alegro. Semos gloriozos de konoser a Karen. Devo de apuntar ke apresiamos sus lavoros kulturales, konsertos, muzikales, rolos teatrales, ets.
Muestras relasiones son muy valorozas...
Klarikam, mi grande amiga, uzavas dizir:
“El Judeo-Espanyol es la mas presioza valor tradisyonal ke mos desharon muestros ansestros.”
Naturalmente mos komunikates i mos pushates a amar i apresiar muestra lingua i a ser eskritoras en EL AMANESER i en la GAZETA ŞALOM.
Una novela buena: Mansevos sefaradis eskrivanos se adjuntaron.
No va desapareser muestra lingua. Estamos pujando kada dia mas. Ma lo importante ke mos da la okazion de alegrarmos es el intereso ke supites inkulkarmos: “Ne pas laisser une langue en veilleuse.”
Me va permeter de rezumir i rengrasiar por un video program maraviyozo organizado por Türkiyeliler Birliği en Israel, prezentado por FANİ ENDER.
Los invitados, KAREN, muestra presidente i realizatrisa, kon su boz de velur, IZZET BANA, muestro profesor del KORO NES, naturalmente un tenor, mos enkantaron una vez mas. Mos kontaron i mos kantaron. Estuvo un program muy riko, una realizasion enteresante... Rekolyo de kantikas deskuviertas, invitados por konsertos por los payises interesados de muestra lingua.
Kerida Klara, realizimos ke siempre, desde siglos, muestra lingua estuvo en muestra vida... A la fin del program, kon muestro grupo NES, kantimos la kantika BEHARVOD Ha.NEGEV en JUDEO-ESPANYOL.
Estamos sigiendo tus konsejos, ermana kerida.
Repoza en pas.
