El Talmud dize ‘Una persona no es olvidada fin ke su nombre es olvidado’.
"No esto puedyendo imajinarme ke sesh milyones de djudyos fueron asasinados en Auschwitz", disho Gunter Demnig en una entrevista.
Este sintimiento inspiro su misyon de aparejar plakas para komemorar las viktimas del Olokosto para ke sus nombres no seygan olvidados.
En1992, Demnig vijito ventidos paizes de la Evropa para depozar las plakas de bronz delantre las kazas de las viktimas.
"Aki bivyo Max Liff. Nasido en 1885 i deportado en 1942. Asasinado en Auschwitz" esta eskrito enriva de una de las plakas.
Nasido el 27 Oktobre 1947, Gunter apartyene a la jenerasyon ke kestyono el rolo de sus padres en la Alemanya de Hitler.
Kuando se ambezo ke su padre aviya partisipado en las atakas aereas en la Segunda Gerra Mondyal, no avlo kon su padre mas de sinko anyos.
El eskultor depozo la primera plaka en Kolonya en 1992, djusto 50 anyos despues ke Heinrich Himmler ordono la deportasyon a los kampos de eksterminasyon.
"Kuando la djente de Kolonya vyeron ke el terror empeso en su sivdad, en sus vizindaryo, o en la kaza ende biven, eyos empesaron a revoltar’ ekspliko Demnig.
Para Demnig, el arte siempre tyene un mesaje politiko.
Gunter Demnig dediko su vida a depozar sus plakas komemorativas en Almanya, Polonya, Austriya, los Payizes Bashos, Fransya, Ukranya, Ungriya i otros payizes evropeos de ande los nazis deportaron las personas a los kampos de eksterminasyon.
Su lavoro inkluye todas las viktimas del Olokosto, djudyos omoseksueles i politikos. El eskulptor esta obtenyendo la informasyon sovre las viktimas del Instituto de la Istorya de los Judyos alemanes en Hamburgo.
Las plakas kostan kada una 120 euros. Los desendyentes de las viktimas estan pagando todos los gastes de las plakas.
Gunter tomo munchos premyos por su lavoro. Allado del Premyo de Erich Kresten, el resivyo 100.000 euros. El eskulptor izo dono de esta moneda a los simeteryos djudyos de Berlin i Dresden.
"Las plakas son la opozisyon a la represyon. Estan djusto enfrente de muestros ojos, ovligandomos a mirar embasho. Proyektos komo este, fasilitan el diyalogo entre Alemanya i Israel", esta dizyendo el diplomatiko Avi Primor sovre el lavoro de Demnig.
Los neonazis destruyeron munchas plakas en Greifswald en el anyo 2012, el diya del aniversaryo del pogrom de November in Greifswald. Grasyas a los donatores, las plakas fueron remplasadas imedyatamente.
A Demnig no le esta enteresando el echo de los neonazis. "El ke kere meldar la enskripsyon enriva de la plaka, en primero deve de abokarse delantre la viktima", dize el.
Demnig tyene mas de setenta anyos, ma el dayinda no kere deshar su misyon.
"Dingun artista ke lavora en un estudyo no eksperimenta lo ke esto eksperimentando yo", disho el eskulptor.
