Ida Benromano
Estas son las palavras de mi madre; kuando estava en sus siete anyos i suvida en una talika pasando del Uzunköprü. Uzunköprü (Uzunkyupri) es un distrito ke pertenese a la sivdad de (İdarne) Edirne; i el nombre viene del ponte largo ke tiene…
Este ponte es el mas largo ponte istoriko del mundo; echo solo de piedra. Su largor es de 1392 metros. la altura de 13.56 metros. La razon de la largura es ke akel tiempo esta rejion era bataklik. Kon el orden de Sultan Murat II, entre los anyos 1427-1443, se konstruyo enriva del Rio Ergene por el Arkitekto Müslihiddin Usta. Akel tiempo la kapital del Imperio Otomano era İdarne, i kon este puente se konektava a Gelibolu, los Balkanes i la Evropa. El puente topo lugar de ser muy stratejiko i importante sovre los kaminos militar i merkansiya… Despues de los dezastres de terremotos (rashes) i inundasiones, a vezes tuvo restorasyones… Oy esta konservado i serrado a vehikulos.
Vos kero kontar una konseja, rekuerdo reel sovre deke este lugar i kyupri es importante, espesyalmente en muestra famiya. Los Djudyos en Trakya tenian una populasyon grande. Bivieron en Edirne, Çanakkale, Tekirdağ, Çorlu, Silivri, Keshan i tambien en Uzunköprü. Mi nono i nona kuando se kazaron ampesaron a bivir en İdarne. Mi nono era SARRAF.
Kuando mi nono salyo fiador a su amigo entimo, fue ovligado de pagar toda la devda de su amigo i kedo dezmudo i krudo sin paras. I ansi fueron ovligados de partir de Idarne i se establesieron en Uzunkyupri ande bivian sus parientes. Por esto kuando saliya sujeto de devdas mi madre diziya: "Si tienes tiempo azete testigo / Si tienes moneda sale fiador" i ansi mos korijava. Mi nona saviya kuzir i era una kuzindera muy famoza. Ampeso a kuzir para sostener a su famiya. I mi nono aziya un poko de sarraflik.
Mi madre i sus tres ermanos nasieron en Uzunkyupri. Sus vidas ayi kontuneo en pas kon los klientes i vizinos asta LOS EVENTOS de TRAKYA o LA FURTUNA en 1934.
Kuando unos kuantos periodistas ampesaron a eskrivir tekstos yenos de antisemitizmo, rasizmo, enemistad i alavasiones al nazizmo, tambiyen a eksitar i provokar al puevlo, empesaron los movimientos yenos de violensia muy terrivles.
Entre el 21 Junio i el 4 del Julio, solo en la parte de TRAKYA i solo kontra los DJUDYOS entraron a las kazas, botikas i sinagogas para yevar lo ke keren o lo ke topan, atakar a las mujeres, dar espanto para ke deshen todo i se vaygan, ke abandonen todo.
I ansi empesaron a fuir los Djudyos. Tambien i de Uzunkyupri. Kuando la famiya de mi madre se desida de abandonar Uzunkyupri, la mujer del KAYMAKAM i ALKALDE disheron "Sin eskapar los fostanes i la kustura, no vos puedesh ir".
Se terminan los fostanes i la kustura, yaman una Talika. Talika era un koche de un kavayo i kavalyero ke se uzava para transportar kozas. Kargan solo los kolchones i las kolchas i en la una de las kolchas la tia Zafira embrujada, porke aviya un mansevo Turko enamorado de eya ke no la keriya deshar ke se vayga. Mi nono, nona, tres ermanos de mi madre i mi madre se suven a la talika uno ensima del otro para la estasyon de tren para Sirkeci, para Estambol.
I ansi fueron la ultima famiya djudiya ke abandona su sivda, ogar, su tierra, Uzunkyupri. Mi madre mos konto asi: Mos suvimos a la talika. Estavamos komo mudos, munchas palavras aviya ke no saliyan de la boka. El kavayo estava tomando su kamino. Estavamos pasando del kyupri largo. Vamos i vamos, el kyupri no se eskapa; vamos i vamos, el küpri no se eskapa. Akeya vez me ambezi deke lo yaman al Uzunkyupri el Kyupri Largo.
El tiempo para ken tiene prisa no pasa!
Kreygo ke esta konsejika reel es una de las repuestas a la pregunta:
DEKE LA POPULASYON DE LOS DJUDYOS (en TRAKYA) SE AMENGUO ASTA UNA FAMIYA DE DOS PERSONAS?
