En la epoka ke estamos bivyendo en el mundo entero, no esta muy fasil de bivir orozos i sin problemas, seyga por los mansevos, seyga por los aedados. Estas avyendo la televizyon u la radyo; las novelas estan enserrando las alas del korason. La situasyon del pais ande estamos bivyendo no esta briyando.
Estas avlando kon amigos, no ay echos, la ekonomiya no esta buena, estan kitando munchos mansevos, porke ay una kriza ekonomika. Los ke estan afuera del pais estan tornando atras, los ke estan aki se estan indo. Todos, mas o menos estan pesimistos en pensando al futuro. El estado psikolojiko de munchas personas esta enfasyada.
Es por esta kavza ke kije partajar kon vozotros, keridos lektores, las formulas de bivir la vida kon felisidad. Los psikologos estan dando emportansa a kuatro formulas de “Felisidad”: Dar loores. Estar sanos i rezyos. Azer buendades. I kerer byen el echo ke estas azyendo.
Dar loores: esta enaltesyendo la enerjiya de la persona, esta aminguando la kanserya i las dolores.
Azer buendades: komo por egzempio vijitar un azilo de aedados, ayudar a un vizino, eskrivir una letra a la gramama; esto todo esta azyendo pujar la felisidad.
La felisidad es en primero la sanedad.
La felisidad esta en muestra mano.
Devemos de aminguar lo ke estamos asperando de la vida, arrepintirmos de muestras ambisyones. Admeter i akseptar todas las kozas negras ke vyenen a la kavesa de una persona, adaptarse a la situasyon mueva para pueder kontinuar a bivir. Lo mas emportante en la vida de una persona es la adaptasyon a los evenementos muevos. Kale azer munchos sakrifisyos, rezistir a las difikultades i ser sezudos.
La kerensya es la felisidad. Para pueder bivir orozos, kale ser pozitivos, bushkar a los paryentes i a los alliados akuruto, aserkarmos de los ke keremos byen, tokarlos i abrasarlos.
Garez, aborresimyento, enemistad i espanto son kozas de los kualos kale estar leshos, porke aminguan la enerjiya de la persona.
Tener tolerensya i pardonar al den frente.
Ser onesto, djusto, i derecho.
La baza de la felisidad es kontertarse de poko i ser lo ke sosh.
Ser afektuozos i dar kerensya al den frente es emportante. Kale saver la valor de todo en su tyempo.
La felisidad es la primera klaredad, la primera luz del dia, la dalkavo eskuridad de la noche.
La felisidad es la karesa de una madre, la mirada de un padre i la riza de una kriatura.
La felisidad esta en la konosensya, es el esforso de ambezar todo.
La felisidad esta en la oja de una flor, en la ala de un papiyon.
La felisidad esta en la vedrura mojada, ande se korye a pye deskalso.
La felisidad esta en la savor del chay ke se beve en una kupa de vidro.
Deke dizimos ke no estamos orozos kuando ay este karar de kozas ke mos apartyenen…
Para estar orozos i bivir kon felisidad, mos kontentaremos kon todo lo ke tenemos i biveremos mas simple.
