De ke nasi asta agora, kada enverano mos vamos a la kampanya. Asta ke kazi, mos ivamos a Yeşilköy. Mi marido se iva a Büyükada. Despues ke mos kazimos me propozo mi marido de irmos a Büyükada por enverano. Aksepti, akel enverano mos fuimos a Büyükada. Ya estava todo muy ermozo. Las guertas, los faytones, la mar, las flores, las golores de los arvoles de akasya, de flamur o de manolyas. Ma las noches me viniya un apretamyento de korason. Despues ke se iva el vapor dalkavo de la isla, me sintiya komo aprezada. Kon tiempos ya me auzi de sorte ke invyerno entero asperava el diya ke mos vamos ir. Desde el mez de Mayo ya ampesava a arekojer la kaza de invyerno, aparejar las kozas para yevar i mas.
Vos eskrivi ke “asperava” de irmos a la kampanya. Este anyo no se lo ke me afito, no teniya ganas ni de alevantar el braso. Esta Korona ke mos se asento en la kavesa no me desho ganas de nada. Dingun gusto. Todo me se estava engrandesyendo en los ojos. La primera i mas emportante razon era ke no teniya ken me ayude. De ke ampeso la pandemiya, komo munchas otras famiyas, no tomi la mujer ke alimpyava la kaza. De sorte ke me kanso i me dezespero. Sigun mi, malgrado ke estava penando de la demanyana asta la noche, yene la kaza no estava limpya.
La sigunda razon era, komo mos vamos a ir? Kon taksi? No savemos si el shofor esta sano. Otobus i metrobus? Muncha djentorya… Sanas ke esten, muestras ijas disheron ya vos yevamos mozotros asta el vapor. Alora pensimos ke vapor? Por modo de la Korona no keremos entrar en la muchidumbre. Kurto vos azere, desidimos de irmos por Bostancı ke es el mas kurto viyaje. I ansina fue. Dishimos no ay fin, ya va eskapar el enverano, mozotros dainda estamos en la sivdad. Seya lo ke seya, al lugar de estarmos en kaza en la sivdad, al menos estaremos en kaza en la kampanya. Deshimos la kaza de la sivdad tala ke estava i vinimos a la Isla.
Ya vinimos, i si? Faytones no ay. Disheron ke van a meter otobuses o arabas ke fonksyonan kon elektrisidad. Por razones politikas no se pudo realizar este projekto. Azer echos sin pensar, se yama esto. Ke va azer este puevlo ke mora leshos? Büyükada es una isla ke tiene rampas. Kale tener un medyo de transporto. Siguro ke afito? Kuando no ay gatos, los ratones baylan. Los ke tienen motosikletas kon elektrisidad, ampesaron a profitar de la situasyon. Para la mas chika distensya demandan presyos astronomikos i non fiksos. Ken demanda 30 ken 50 Liras.
Entrimos a kaza, ya me se karadeyo de muevo de pensar komo se va alimpyar la kaza ke kedo serrada durante 10 mezes. Komo el tiempo esta kayente, las ventanas i puertas avyertas, mos atrivimos a tomar a la mujer del guartelano ke mos ayude a alimpyar i bendicho el Dio me se eskaparon los penseryos i el albon.
Ansina es ke eskrivi ariva ya vinimos, ya vinimos. Enveranada alegre i sanos i rezyos.
