El Sentro Sefaradi d’Estanbol oy en diya tyene dos grupos en el whatsapp, “Kazika Kultura Sefaradi”. Tyene un alay de miembros. Entre eyos ay unos ke eskriven kada diya, mizma kada ora, mizmo unas kuantas vezes en una ora. Un mez antes, Daniel Levi de İzmir me eskrivyo diziendome ke keria azer aktividades sovre esta lingua i le dishe ke puede venir al grupo. Despues, munchos İzmirlis vinieron tambien kon la propozisyon de Daniel. Ay personas muy valutozas entre eyos. Kon eyos, el grupo ande avia a vezes avlastinas empeso a ser mas seryozo. No se komo, todos empesaron a eskrivir dichas, biervos i palavras enteresantes i ke no se saven muncho. I unos kuantos diyas despues, los ke lavoran la noche toparon mas de 100 mesajes a la fin del diya. I si keren meldar deven de meldar todo en mas de una ora. A la fin vyeron ke esto no era posivle en este grupo i formaron un otro: “Leksiko del Judeo-Espanyol". Ay unos kuantos diyas ke todos estan eskrivyendo. I vemos ke no ay una grande diferensya entre el Judeo-Espanyol de İzmir i el de Estambol. En syertas dichas i proverbos vemos ke ay diferensyas; esto es la rikeza de muestra lingua. Oy a las 10 de la noche veygo ke resivi 99 mesajes. En kada mesaj ay un biervo o una dicha. Komo ay dos anyos ke el grupo esta lavorando sovre los proverbos, no keremos mas proverbos. Kuando vamos a eskapar el lavoro sovre los proverbos vamos a ver si ay mas. “Sorretear, kedar zilkade, kidear, kukuvaya, klavo de komer, kachavida (tornavida), danalya (kerpeten) (no se si los dos dalkavo se uzan solo en İzmir), pinya, pinyon, eskaravajo, kukaracha, pinya, salitra (en İzmir), pitagra (pestil), los mansevos no konosen muncho ni el pestil porke no se kome oy en diya komo anyos antes, fostan de pitagra, ruidos (rumores), chapeta, anyos i panyos, kukuvaya... Estos son una partida ke fueron eskritos solo oy. Ya puedesh imajinar lo ke se akumula en un mez. Es djusto ke todo esto va topar fin un diya. Ma devemos de azer esforsos para arekojer lo mas muncho de biervos i de dichas. Kero rengrasyar a todos ke estan partisipando i sueto ke el grupo kontinua a ser aktivo.
Vos avia kontado ke estavamos azyendo un proyekto kon el Museo Djudio de muestro pais, azyendo reportajes kon personas ke bivyeron en syertas sivdades i maalles ande no biven mas Djudios. Malorozamente muestro proyekto no se esta realisando muy fasil porke ay tres-kuatro mezes ke no pudimos lavorar. No fue posivle de azer reportajes porke dingunos no kerian estar en una kamareta achakes de la “Korona”. Este fin de semana va envitar a Alberto Modiano a la Ada i vamos a realisar a lo manko 6 reportajes en el Klub. Diya de alhad avli kon un Edirneli, un Tekirdağlı, una de Galata, uno de Gaziantep i un Urfali. Kreo ke va pueder avlar kon una de Kırklareli. Este modo vamos a pueder kontinuar. Ke no vos pareska ke el echo se eskapa kon el reportaj. Despues devemos de eskrivir todo i tomar fotografias lo mas muncho posivle porke a la fin keremos azer un album i un filmo kon las 70 oras de reportajes.
