Kon la deklarasyon resiente ke la Ayasofya iva ser konvertida de muevo a una meshkita, empesaron munchos debates sovre la tema de erensiya kultural i las maneras distinktas de konservasyon - o en munchos kavzos - falta de konservasyon ke vemos en el mundo. La proteksyon de erensiya kultural tiene una relasyon paralela kon munchos faktores diversos komo el nasyonalizmo, los valores sosyales, i la manera en ke mos aserkamos a la istoria. Es muy natural ke el troko funksiyonal de la Ayasofya fue una grande desepsyon para munchos. Por mi personalmente la rekonversyon de la Ayasofya a una meshkita fue una koza ke nunka pensava ke iva akonteser de vedra. Siempre pensava ke esto era simplemente el objekto de retorika politika de algunos grupos mas o menos marjinales. I entonses para mi fue un haber reelmente dezilusyonante.
Komo todos savemos, la Ayasofya es un monumento de enorme emportansya simbolika, kultural, i istorika. Por munchos i munchos anyos la Ayasofya fue el mayor i mas alto edifisyo en el mundo. Durante los siglos dezde su fragua en el periodo bizantino, la Ayasofya fue uzada komo iglesya ortodoksa, iglesya katolika, meshkita otomana, i muzeo sekular. La funksiyon de muzeo ke empeso en el anyo 1935 fue konsiderado la mijor forma de konservar todos los elementos distinktos ke fueran adjuntadas a la Ayasofya durante su istoria larga. Kuando la Ayasofya se izo muzeo, los elementos kristiyanos komo los mozaikes ekstraordinaryos ke se topan en el edifisyo fueron deskuvyertos de muevo. Esto izo una imajen muy spesyal i emosyonante ande los detayes kristiyanos i muzulmanos se mezklavan en una armoniya poko komun i vedraderamente ermozo. Fue achakes de esta armoniya vizual ke la Ayasofya se torno a uno de los mayores i mijor konosidos simbolos en el mundo kon milyones de vijitantes.
Monumentos komo la Ayasofya ke tienen emportansya grande i simbolika para munchos grupos tambien tienen menester de ser guadrados komo erensiya mundial ke apartiene a toda la umanidad. Vide munchas personas en diferentes payizes keshandosen - kon razon - de la konversyon de la Ayasofya. Ama yo tengo unas kritikas sovre munchos de estos komentarios. Yo penso ke estos apoyos tienen ke ser universales. I si unos se estan keshando sovre el statuo de la Ayasofya ama al mizmo tiempo inyorando el estado de la erensiya multikultural en sus payizes, sus apoyos piedren sus valor. Por egzemplo, si endjuntamos muestros apoyos sovre la Ayasofya kon demandas sovre el statuo de las antiguas meshkitas i sinagogas en Espanya (ke dainda son iglesyas) kreo ke muestros apoyos seran mas fuertes. Ansina, yo kreo ke ay menester de krear una platforma internasyonal para la proteksyon de erensiya mundial multikultural komo la Ayasofya.
