Ansi empesa la perasha “Devarim”, ke es el empesijo de el sinken livro de la Tora. Estas son las palavras ke avlo Moshe a el puevlo de Israel. Son palavras de kastigeryo. Moshe Rabenu en sus diyas de alkavo, kastigo a el puevlo djudyo, en la yanura de el Yârden. El les izo akodrar los yerros ke izyeron entervalo de kuarenta anyos en el dizyerto, los diyas ke vinyeron kontra el Kriyador, ke disheron, mijor era de murir en Mistrayim, ke de vinir a este dizyerto, ke sirvyeron el idolo de Peor. Ke disheron a Moshe Rabenu no ay simiteryos en Misrayim ke nos trushites por murir en el dizyerto? Vos keshatesh por la magna ke vos dyo el Kriyador. Por mantenervos, izitesh el bezero de oro. Les aze akodrar Moshe Rabenu el yerro ke izyeron los eskulkadores de avlar mal por la tyerra prometida. Moshe Rabenu todos estos kastigeryos los izo a el puevlo djudyo sekretamente. No los kijo azer averguansarlos, de la estima ke teniya verso el puevlo djudyo. Ma despues vemos ke Moshe Rabenu klaramente les aze akodrar las yerros ke izyeron al puevlo, entervalo de los kuarente anyos ke estuvyeron en el dizyerto. Dizen, nuestros savyos la persona ke aksepta i desha a su pekado, este pekado se le aze merito. Moshe Rabenu ke konosiya muy bien a su puevlo, ya entendyo, ke el puevlo akseptaron sus yerros dunke no aviya ningun danyo de akodrarselos klaramente ke todos los yerros se izyeron meritos. Moshe Rabenu ekspliko la Tora entera a el puevlo djudyo malgrado ke ya avian sintido en el Monte Sinay. Moshe Rabenu tuvo de menester de repetarlo a los ke nasyeron en el dizyerto, a la jenerasyon nueva.
La jenerasyon nueva no aviyan sintido en el Monte de Sinay de boka de el Kriyador, sino ke eyos sintyeron todos estos evenemyentos de boka de sus djenitores. Malgrado ke la jenerasyon nueva teniya una grande fey i kreyensa, Moshe Rabenu tuvo el menester de eksplikarles el mizmo.
Moshe Rabenu disho a el puevlo djudyo: El Kriyador enkomendo i disho, asta agora ke estuvitesh lado el monte de Sinay ya afirmatesh munchas enkomendansas, ya resivitesh la Tora, ya fraguatesh el tabernaklo, ya formatesh el Sanedrin, el tribunal. Agora kamina adelantre. Agora vos se esta avriyendo el kamino de la tyerra prometida.
Moshe Rabenu eskojo i tomo el biervo Devarim por el empesijo de la perasha. Mizmo biervo Devarim la sinyifikasyon es bizbas, komo las bizbas nos dan miel ke es dulse i la Tora nos adulsa a nozotros, i es vidas para nozotros, komo es dicho arvol de vida es a la ke la sostyenen, i todos ke sostyenen a la ley son orozos.
