Keridos Lektores
Las semanas dalkavo estuve meldando un livro muy enteresante i ermoso de Azra Kohen (Gör Beni). En el livro uvo pasajes istorikos muy antiguos de entre 2000 i 4000 anyos de antes del nasimiyento del Kristo. Vos tengo ke eskrivir al sujeto de los Sumeres ke bivian en akeyos anyos en la Mezopotamia. Era una komunidad muy sivilizada ke asta oy en diya utilizamos sus sensyas i kultura.
Komo lo savemos? De las tavlas de barro eskritos kon klavo. Fista oy se topo i se estan topando miles de tavlas. Las 22.000 tavlas fueron investigadas.
Los Sumeres fueron los primeros ke fiksaron el tiempo, komo la ora, el punto i el segondo. El dia i los mezes, esto kere dizir ke eyos deskuvrieron las planetas en el espasyo. I despues los Asurianos kontinuaron a deskuvrir.
Disheron ke el Sol se topa en medyo del espasyo i las planetas se tornan en el entorno del Sol. Fina oy se save ke la verdad siyentifika es esta. Despues de deskuvrir la astronomia i eskrituria, eran muy adelantados en linguas, medisina, matematika. Eyos kreiyan en munchos dyoses, mitolojia i literatura.
Eyos fueron los primeros ke dekoraron el arvole del anyo muevo. La piedra blu del nazarlik i el aniyo de kazamiyento se vido en eyos por la primera vez.
El pais era dirijido de parte del rey i de los papazes.
En la istorya, primera vez utilizaron reglas de derecho, se puede dizir ke era el primer estado juridiko.
I finalmemente en la literatura, eyos fueron los primeros ke publikaron lejandas komo la Epeopea de Gilgamesh.
Kreo ke lo mas de vozos estudio esto todo en las klasas primeras, ma ayinda es muy enteresante de saver ke tantos mil anyos antes, uvo una sensya tan grande i komunidades tan entellijentes i meoyudos.
Vos saludo de korason
