Myerkoles demanyana me esperti kon un telefon de una amiga muy kerida. Veramente me espanti porke estava muy demprano. Es verda ke me esperto demprano i mis amigas ya saven ke me pueden bushkar la ora ke keren ma yo yene me espanti. Al lugar de dizirle buenos diyas le dishe:
Hayrola estas oras? Eya kon una emosyon: Ya meldates la gazeta?
No kualo ay, ke afito?
Toma la gazeta i melda!
Ke afito? Ken se muryo? Gerra ay? Rash uvo?
Tu inyeto salyo a la gazeta; te felisito!
Oras buenas, mi inyeto salyo a la gazeta? De uzansa mi ijo komo es muziko, lo mas de diyas esta en los medyos de komunikasyon, mi inyeto ke busha en la gazeta. De vista abashi a la eskala i tomi una gazeta. En la oja de la revista la foto i un artikolo dizyendo:
El 4 de agosto el grupo DUMAN se reunyo kon sus fanes en el Antik Teatro de Bodrum. Los ke vinyeron a ver el konserto se enkontraron kon una surpriz. La avyertura del konserto fue realizada por los ijos HAKAN i VOLKAN del solista Kaan Tangöze i el ijo del bas gitaristo, Ari Barokas ASLAN BAROKAS kon un mini espektakulo de bateri.
El trio DUMAN Junyor’s resivieron munchas palmas por el publiko durante 5 minutos i al final dyeron el saludo abrasados komo lo dan sus padres.
Syempre me glorifiko kon mis ijos ma ver a mi inyeto ke salyo a la shena fue un orgulyo para mi i me emosyoni muncho. Proverbo falso no ay. IJOS DE MIS IJOS DOS VEZES MIS IJOS.
