La semana pasada komemorimos Tesha Be Av. Un diya de dolyo para mozotros porke afitaron munchos evenimyentos tristes en muestra istorya. La destruksyon del primer i sigundo Beit Hamikdash, La Expulsion de Espanya, El primer treno yeno de judios ke yevo a los kampos de konsentrasyon. Este diya es diya de taanit. No vistimos kozas muevas, no azemos alegriyas i no azemos kozas peligrozas komo viajar, suvir a bisikleta, nadar en la mar ets.
Despues de Tesha Be Av, fiestamos el 15. diya de el mez de Av, el “Diya de Amor”. Diziendo amor no kale entender solo el amor entre dos personas. El amor es un sentimiento ke se topa aryentro de muestros korasones desde ke nasimos. Mos viene del Dio. El mos dize: En primero vas a kerer bien a ti mizmo. Ke no vos pareska ke esto es egoizmo. No! A la kontra. Todos tenemos muestras kualitades i muestras faltas. Si mos konosemos a mozos mizmo, ansina puedemos ser mas toleransyozos para el denfrente. “Im ein ani li, mi li?”. Si yo no so para mi, ken va ser por mi? Tanbien mos dize “Vas a kerer bien a tu vizino komo te keres bien a ti”. Keremos bien a muestra famiya, a los amigos, a las bestias (no todas, komo los moshkos) a las flores, a la natura. Vamos a dizir por esto se kere un diya espesial? Es komo el diya “Valentine’s Day”. Este diya tiene una istorya del Talmud.
En la tradisyon judiya el 15. diya de el mes de Av, Tu be Av es un diya muy alegre. Es el diya de Amor ke lo yamamos Yom a Ahava. Sigun la Mishna, Tu Be Av era un diya muy alegre en el tiempo del Beit Hamikdash en Yerushalayim, a proposito del empesijo de la rekolta de las vinyas.
Ma en el livro de “Shofetim” ay una istorya. Un diya los mansevos de la tribu de los Binyamin, violaron una djariye de los Levis. Sovre esto salyo una gerra entre dos tribus. I los Leviites los desecharon, alesharon a los Binyamines.
Los hahames, los savios del Konsilyo, dieron un karar para no azer peryer una tribu de judios. El diya de Tu be Av, ke es el 15 diya del mes de Av, las muchachikas de la tribu de Levi se ivan a vistir de blanko segun la tradisyon ke konosemos i ivan a salir al kampo ke se topava al lado de las vinyas i ivan a metersen a kantar i a baylar. Akel momento los mansevos de la tribu de los Binyamines ivan a salir de aryentro las vinyas ande se eskondyeron i las ivan a yevar una a kada uno a sus tierras.
De akel diya en delantre este diya se fiesta komo “Yom A Ahava”. Un diya alegre.
Kitaremos de muestros korasones todos los sentimientos negativos, mos kereremos bien para ke el mundo seyga yeno de amor i ermozuras.
