La konvensyon de Estambol, tambien konosido komo la konvensyon para la prevensyon i lucha kontra la violensya domestika, es un tratado organizado por el konsilyo de Evropa ke fue sinyado por 45 payizes en el anyo 2014 en la sivdad de Estambol. En akel tiempo la Turkiya fue el primer payiz a sinyar la konvensyon i fue konsiderado un grande paso en el kombate kontra la pandemia de violensya domestika i violensya maskulina kontra mujeres. Ultimamente esta konvensyon topo de muevo un lugar en muestras vidas i muestras diskusyones kotidyanas en la Turkiya. Al mizmo tiempo meldi unos haberes ke la mizma diskusyon empeso tambien en la Polonya, ande el governo de la derecha-katolika salyo kon la mano dainda mas fuerte despues de las eleksyones resientes. Kale demandar ke afito ke en estos payizes una parte de la sosyedad esta aziendo un esforso tan grande para deshar una konvensyon ke ambisyona protejar las mujeres?
Munchas vezes kuando pensamos en el movimiento feminista i los ganyos ke tuvieron las mujeres en todas partes del mundo, imajinamos un progreso konstante i una situasyon ke esta kada vez mijor. Ama penso ke ay menester de entender ke munchas vezes kualker forma de progreso rezulta en muncha opozisyon. Istorikamente las institusyones fuertes i bien establesidas komo las instutisyones del estado o de la relijion fueron opozitores prinsipales a los trokos sosyales. Esto fue el kavzo kon el movimiento kontra la eskravatura, el movimiento feminista, i mas resientemente el movimiento LGBT. Yo penso ke deviamos analizar la opozisyon kontra la konvensyon de Estambol de esta manera - komo una forma de opozisyon manifestado por las institusyones patriarkales ke son kontra la emansipasyon sosyal, politika, i ekonomika de las mujeres.
Kuando oygo los argumentos de la djente ke esta kontra la konvensyon veygo ke son reelmente personas ke kreen ke una konvensyon ke da valor, emportansya, respekto, i proteksyon a las mujeres tiene el potensyal de ruinar la fondasyon de las famiyas i ansina el orden de la sosyedad. Este pensamiento es profundamente bazado en falsedad i ipokriziya. La violensya kontra mujeres rezulta en sentenas de muertes kada anyo. No ay dinguna semana en ke no oyimos haberes devastadores sovre mujeres ke son atakadas o matadas violentamente. Los grupos kontra la konvensyon de Estambol son kompletamente insinseros porke no tienen dinguna alternativa ke va protejar las mujeres. Entonses por mi, no es yerrado dizir ke estos grupos benefisyan de la patriarkiya de tala manera ke dan importansia mas a sus proprio status ke a las vidas de mujeres, i sus derecho de bivir sin violensya. Por esto es kompletamente inakseptable deshar ke estos grupos mos metan en un kamino para atras, en kual payiz ke sea. La konvensyon de Estambol da proteksyon i vida a las mujeres, entonses tiene ke ser mantenida i implementada!
