No se si vitesh el filmo, o si meldatesh el livro ‘The Boy with the striped pyjamas’. La estorya es sovre el Olokosto, ma kontado de una forma muy diferente.
Bruno es un ijiko de mueve anyos ke se engrandesyo durante la Segunda Gerra Mondyal en Berlin. Segun el orden de Hitler, el padre de Bruno se aze komandante, i se van a bivir a "Out-With".
De la kaza de Out-With, Bruno esta vyendo un kampo ande ay ombres i mujeres kon pijamas reyes. Un diya, Bruno se desida de ver el kampo de serka. Se va fin al kampo ke esta anturado kon una baryera. En la otra parte de la baryera, rankontra un ijiko de su edad, ke se yama Shmuel. Bruno i Shmuel se azen amigos.
Kaje kada diya, Bruno se va a ver a su amigo i le yeva komida de kaza. Un diya Shmuel le dize a Bruno ke su padre desaparesyo, i no lo esta topando.
Bruno i Shmuel azen un plano para ke Bruno pueda entrar al kampo i ke puedan bushkarlo endjuntos. Shmuel le traye una pijama reye, i Bruno se kita los vistidos, se viste la pijama i entra al kampo. Despues los dos, kon un grupo de prizioneros, empesan a kaminar. El grupo se esta indo a la kamareta de gaz. Bruno supsona ke es semplemente un refujyo de la tormenta de afuera. En la kamara de gaz, Bruno le dize a Shmuel ke esta triste ke no lo puedyeron topar a su padre, i le dize ke el va ser su mijor amigo por la vida entera.
Unos kuantos diyas despues, un soldado topa los vistidos de Bruno. El padre de Bruno se asenta allado de los vistidos i empesa a yorar.
Despues de unos kuantos mezes, las tropas aliadas empesan a apanyar a los nazis. El padre de Bruno, sintyendose kulpavle, no se fuye, i se desha ke lo apanyen.
‘Todos mos paresemos, i no semos diferentes’ es el mesaje moral de la estorya. Un mansevo aleman se esta azyendo amigo intimo kon un prizonyero judyo ke esta bivyendo en el orivle kampo de konsantrasyon de Auschwitz. Mezmo ke son de diferentes kreensyas relijyones, i biven en sirkonstansyas tan diferentes, Bruno i Shmuel se azen amigos intimos. La baryera ke los esta separando es el sembol de los obstaklos relijyozos, sosyales i politikos ke estan divizando las personas en el mundo entero. La baryera, la ambiyansa danjeroza del kampo de konsantrasyon, la diferensya entre los dos ijikos no son obstaklos para eyos. Una amistad inosente enflorese entre los dos.
La amistad de Bruno i Shmuel ke enfloresyo en medyo de un senaryo tan orivle, es el mesaje del eskrivano ke kere amostrar ke los obstaklos no son emportantes si ay kerensya i amigavle. Mezmo ke estan en una atmosfera tan negra, i mezmo ke estan vyendo la grande diferensya entre los dos, Bruno i Shmuel, de parte a parte, reushen a topar kalidades pozitivas ke los aze aserkar, i se konvierten en amigos entimos.
El akto de Bruno, (vistirse la pijama reye i entrar al kampo de konsantrasyon), esta amostrando el kontrasto kon el mesaje de superyoridad rasyal i etnika propagada por los nazis. Este akto kere amostrar ke dinguno no es superyor al otro.
