Mis rekuerdos se animaron pensando a mi madre kerida, amoroza, entuziasta de kultura. Los livros eran su bueno.
MAMAN JE T'AIME
Este livro presiozo editado por JEAN -CLAUDE LATTES, Citations et Proverbes, Poèmes et Proses, era su livro preferado. Se puede apresiar Racine, Marcel Proust, Lamartine, Rimbaud, Jean de la Fontaine, ets. Me ekspresava i me meldava las poeziyas spiritualmente enteresantes.
Me lo avia ofresido a la fin de sus diyas (metio i una nota intima a la pajina de alkavo). Penso ke keriya demostrarme su kerensia... Ofreserme su livro tan valorozo para mi fue un regalo maraviyozo. Es mi "livre de chevet" (livro de kavesera) tambien.
Desidi de revelar mis suvenires intimes.
Mi mami era mi amiga adorada, de 20 anyos mas grande. Era moderna i tenia un razonamiento avant-gardista. Kuando era estudiante en Notre Dame De Sion, se glorifikava kuando me dekoravan de una bareta yamada: "Attestation d'Honneur".
Me rengrasiava i me yevava al sinema ATLAS fin de semana. La seans era un randevu por los jovenes de 12-15 anyos. Mos enkontravamos los unos kon los otros.
Me plazia kaminar de Taksim - İstiklal Caddesi, engajada a su braso i diskutir i saver sus ideas konsernando mis amigas, konsernando tambien la moralita del filmo, los aktores i las aktrisas. El romantizmo, el amor de los filmos me atiravan. Era un plazer de ser akompanyada por mi kerida madre, elegante, fina i entelijente.
Un diya, en las eskaleras de la eskola, se aserka una amiga:
-Esti, mi ermano M. i sus amigos de St. Michel te keren invitar para tomar un te en Kervansaray, enfrente de la eskola. Sera un plazer i para mi de pasar tiempo endjuntos kon ti, mi muy buena amiga, para oyir una orkestra i amuzarmos.
Me parese ke tuve el shok de mi vida!
-Te rengrasio, ansi ke tu ermano, kerida amiga. Me ekskuzo, por la razon ke salgo solo kon mi mami i papa i mis primas. Esto refuzando...
-Si keres pensa, demanda a tus parientes i me respondes fina Shabat.
Kuando vine i konti mi konversasion a mi madre:
-Esti, no se refuza una invitasion de una amiga ke apresio, ansi ke su famiya, sus amigos. Son ijos de buena famiya. Absolutamente vas a akseptar. Kada persona deve de tener amigos de su edad.
Las diskusiones kon Sarika, mi madre, kontinuo. Un diya viendo mi timidita, me disho:
-Hanuma, yo no va pueder akompanyarte para ir al sinema. Devo de okuparme i de tus ermanas, las buchukas.
Mi madre era muy desidada a embiyarme a azerme partisipar a un grupo de muestra komunita judia. Oy en diya penso, antes anyos, komo me avia konvensido a embiyarme a mis 16 anyos. Mis amigas fueron privadas de azer frekuentasiones antes de aver eskapado el liseo. Penso i me sorprendo: No se si yo puedriya azerlo si teniya una ija... Era anyos antes, en los 1960 i yo teniya solo 15 anyos...
Keridos lektores, vos sueto dias buenos.
UN PROVERBO:
Les enfants sont un héritage de Dieu (Bible, Psaumes)
Las kreaturas son una erensia del Dio (Biblia, Psalmos)
.
