İSAK ESKİNAZİ
El nombre Israel, lo meldames en la Tora, ama devemos tambien bushkar si otros puevlos, otros eskrivanos mensyonaron este nombre en sus eskritas.
Los grandes eskrivanes ke konosemos komo Hesiodes, o Homeros eskrivyeron epopeas i mitolojias sovre los dioses ke kreyeron, bazandosen sovre la psikolojiya umana. Kada akto, kada sentimyento, kada karakter umano, se lavro komo lejendas, trajedias o istoryas umanas. Por esto el nombre de Israel no se topa en las ovras ke eskrivyeron a parte de los tekstos del Tanah, el nombre Israel lo enkontramos por primera vez en una Stela [piedra eskulkada ande eskrivyeron tekstos, anunsyos, tratados o rekuerdos], 1200 anyos A.M.E. (antes de muestra era). El Paro Meneptah en una de las inskripsyones avla de la kampanya militar en la kual venso Israel i los otros reynados i nasyones del Levant.
Otra Stela Moabita, konosida komo Stela Mesha tiene una enskripsyon de Mesha, Rey de Moab, en el mueven siglo A.M.E. Esta inskripsyon mensyona la viktorya sovre Omri.
"Omri era rey de Israel i el oprimiya Moab por munchos diyas, i su ijo tambien kijo oprimir Moab. Ama yo, Mesha, pude venser Israel ke se izo una ruina.“
Un giya de Turismo de Israel, Avinoam Ben Dor, dize ke la primera vez ke se ve el nombre de Israel fue probablamente la del papaz elenistiko (en la epoka de Aleksandro el Magno) ke bivyo en Misrayim en el tyempo de la traduksyon de la Tora. Manetho eskrive la istorya de los leprozos i adjusta ke los Israelyanos invadyeron Ejiipto porke no les era permitido de bivir aya. Asi este Papaz falsifiko la istorya dizyendo ke los Israelyanos kedaron aya asta ke los Ejipsyos los arondjaron ahuera de sus tierras.
En el segundo siglo (AME) un eskrivano Ejipsyano, Lichimus, eskrive su propriya versyon de los leprozos dizyendo ke el puevlo djudyo kuando estava en el dezyerto, Moshe ofresyo de invadir i konkerir la tierra de Israel arondjando los abitantes de aya ahuera. El istoryador Lindsay Hall dize ke los eskrivanos komo Josephus o Philo, ke eran djudyos, empleyaron este nombre de Israel ma los eskrivanos gregos de la antikuedad no supyeron lo ke era Israel aun ke konosyeron djudyos ke bivyeron en Sardis, Halikarnasos (Bodrum de oy) o Smyrna (İzmir de oy).
Por esta rejyon avlan de los Hititas, ma no de Israel. En el Tanah se avla de Yavan por Gresya, palavra ke devia de azer referensya a Iyonya. De otra parte Harriet Flashenburg, profesora de istorya, dize ke Gregos, Ejipsyos, Babilonyenos i Persos supyeron muy bien sovre los Israelitas, i de eyos kopyaron la forma de ambezar i de bivir. Papazes de la Roma antigua i Rabis estudyaron endjuntos. Munchos Gregos i Romanos adaptaron la forma de vida del mundo Djudyo.
Los Djudyos eran edukados mijor ke los otros porke tuvyeron de abandonar sus payis. El puevlo Djudyo devia de ambezar komo bivir en kada sosyedad para pueder sobrebivir. Agora Israel es la kaza de todos los djudyos.
