No se komo empesar a eskrivir keridos lektores, tanto esto emosyonada, triste i abatida de la piedrita de esta amiga, kerida, ermana, aliada… Ay munchas piedritas en la vida ma, la mas triste es una muerte sin piadad, una muerte kruela…
Lizika, una kerida de 62 anyos, komo de kara riyendo, afektuoza, hatirshinas, komo de resivida en su kaza kon mil aparejos, la enerjiya pozitiva ke dava a todos, su rizika alegre de aryento del korason no se va efasar de muestros uyidos, un korason de oro, una persona spesyal, ke tu alma repoze en Ganeden akompanyada de todas las luzes del mundo.
Veramente una pedrita muy grande, muy doloroza para su famiya i todo su entorno.
Una mujer muy spiritual, sinsera, entelijente, franka, buena mujer de su marido i buena madre de su ijo. Kon su semplisita i modestia, se aserkava de todos de una manera igual i abrasava la vida en azyendola yena de divertimyento. Teniya una spesyalita de tomar la vida de la parte alegre, pozitiva kon shakaikas.
Kerida Lizika, amavas kon grande amor tu padre i tu lugar esta allado de el. No te pudites salvar de esta hazinura maldicha i sufriyites muncho. Ke tu alma repoze allado de tu padre i madre en Ganeden. Mos deshates un rekuerdo bivo de tu personalita, no mos vamos a olvidar de ti nunka…
Pasensya a tu marido, ijo kerido, ermuera, a toda tu famiya i a todos mozotros, amigos, ermanikas i keridos… Ke sentiyes en tu lugar repozada, komo sentiyates en tu vida…
