Komo la Alemanya paso en la mano de los nazis? Komo los alemanes se fueron detras de Hitler? Aki no puede afitar una koza asemejante.
Ya estash seguro?
Este es el tema del livro "The Wave". El profesor de istoria de una eskola, Burt Ross, kon un eksperimento, se desido a amostrar a los elevos komo esto puede afitar en kualsiker lugar. A este eksperimento, en lugar de nazizmo, le dyo el nombre "La Ola". Los elevos empesaron el eksperimento kon muy buenos sentimentos. El profesor deklaro ke el va ser el lider del movimyento i empeso a proklamar ideas sovre el poder, la disiplina i la superioridad. En primero, empeso a endoktrinar la klasa kon la doktrina ‘Fuersa a traves la disiplina’. La klasa dyo muy buena reaksyon a esto, i empesaron a aplikar esta doktrina. Sorprendido, Ross empeso a yevar el eksperimento mas aya: la segunda doktrina fue "Fuersa a traves la Komunidad i Fuersa a traves la Aksyon".
En los diyas sigientes, ‘La Onda’ gano grande populatridad. Los elevos empesaron a aplikar las doktrinas tambien afuera de la eskola. Los myembros de la Ola tambien tyenen sloganes i un saludo espesyal. Todos los myembros se estan sintyendo iguales. Tyenen reglas a aplikar. Se estan kreyendo ke la Ola les va azer ganar kozas grandes.
Ma, unos kuantos diyas despues, el lado obskuro del movimyento empeso a salir en medyo. El movimyento empeso a salir de kontrol. Los myembros del muvimyento empesaron a dezrepozar i a aharvar a los elevos ke estan kontra la Ola. El direktor empeso a ver el efekto negativo del movimyento en la eskola. Los myembros del movimyento estan tanto entuziastos ke no estan puedyendo ver la realidad.
Ross reunyo los myembros del movimyento i empeso a amostrarles las fotos de Hitler i de los mansevos, myembros del partido Nazi. Les disho ke los myembros del movimyento "The Wave" se puediyan azer muy buenos nazis si el eksperimento kontinuava. En akel momento, los elevos se apersivyeron lo ke iva pueder afitar si Ross no eskapava el eksperimento.
En aplikando este eksperimento ke fue bastante para endoktinar la majorita de los elevos i komo en poko tyempo se konvirtyeron en un grupo fashisto, el profesor reusho a amostrarles komo los sivdadanos alemanes permitieron ke afiten las atrosidades del Olokosto.
Este livro esta ensenyando una koza ke es difisil por los elevos de entender. Komo en este eksperimento, Hitler kon sus taktikes reusho a transformar los nazis en una fuersa brutal, ansi en un sembol de malisya.
Komo en el eksperimento, en el empesijo, la malisya se amostra komo una koza buena. Kon la presyon del grupo, los myembros syenten la nesesidad de apartener a un grupo sekreto. Esto les da un entuziazmo, i empesan a despresyar los otros. En poko tyempo, renonsan sus identidades i el mal empesa a dominar.
Este eksperimento esta amostrando komo los komportamyentos del umano pueden salir de kontrol i en trokando su psikolojiya, la persona se transforma en un satan komo en el Olokosto.
