Es alhad a la noche ke empesi a pensar lo ke devo de eskrivir esta semana en mi artikolo para el Şalom. Aviya dos kozas importantes para tratar i eskrivir. La prezentasion ke realizimos kon Karen en el zoom de, "Los Enkontros deAlhad" ke era muy importante para mi. Mizmo si no tengo una buena pronunsiasyon, avlar mas de una ora en un sujeto tekniko ne es muy fasil. Si konosesh el sujeto es puedeser mas fasil.
El diya de vyernes resivimos los muevos CDs i DVDs del lavoro realisado por İzzet Bana i las Estreyikas d’Estanbol. Diya de Alhad fuimos endjuntos kon İzzet Bana al Anadolu Kulübü para egzaminar las kondisyones para pueder realizar un konserto kon las kondisyones de la Korona. En primero tomimos la permisyon de los dirijentes de muestra Komunidad. I las kondisyones eran de ovedeser a las reglas de la Korona asentandose a una distansya i teniendo la maska/karatula. Esto es la sola posibilidad de pueder organisar un konserto. I vamos a ovedeser a todas estas reglas para pueder azer este konserto, porke kreo ke no va ser muy kolay de azer un evenimyento asemejante en invyerno.
Kuando vash a oir el CD, vash a ver el lavoro ke realizo İzzet Bana. Este lavoro fue echo kon el apoyo del “Sentro de la Erensia Djudia de Salonika i Gresia”. Estavan aziendo un proyekto de unos kuantos albumes de kantes sefardis para las kriaturas. No sinti los otros CD’s, ma İzzet lavoro muncho para realisar este album. Ay munchas dichas i repetisyones ke no se uzan mas i ke en este CD fueron empleados. En el empesijo de kada kantika İzzet empleo una partida de la kantika kantada por una persona de una syerta edad. Sin muzika. No kreo ke va ser posivle de azer un CD asemejante dyes o vente anyos despues. Se konta ke en la Kula despues de la orasyon de Simha Tora, las kriaturas kon los feneres en la mano kaminavan del kal de Apollon fin a la Kula kantando, “Ashiya mi koles, syen paras mi koles”. Ya savemos ke no se emplea la lumbre en Simha Tora komo diya de Shabat. I İzzet disho ke esto es para emplear la lumbre en las kazas! En mi vida no tuve el mazal de ver estos evenimyentos, porke no morava en este kuartier. Ma oy en diya no se azen mas estos evenimyentos. Es djusto ke mos akodramos de “Kayikchi Balat’a, Pishkadikos de la mar; Chup chup a la mar”, ma una grande partida de estos refranes no se emplean mas. Kon el CD vash a topar un DVD ande las kriaturas de las Estreyikas d’Estanbol djugan diferentes djugos ke se djugavan kuarenta o sinkuenta anyos antes. Esto siguro ke el DVD vos va plazer muncho. En este proyekto, la muzikologa Susana Weich Shahak fue la investigadora. La konosko porke dos anyos antes era la prezentadora del Dia del Ladino en Estanbol. Es una muzikologa muy importante en este kampo.
El CD fue realisado por el Şalom i por su editora Gila Erbeş ke lavoro endjuntos kon Karen Şarhon para los tekstos en Judeo-Espanyol i en Inglez. Las kero rengrasyar por sus lavoro.
No vos olvidesh ke solo 300 personas van a pueder segir este konserto en la Büyükada. Kale dar karar presto para tomar las invitasyones. Kale bushkar a Emel: 0555 5956358 o Tilda: 0212 2404144 para demandar invitasyones. I las vash a resivir. Vos asperamos el 6 del Septembre a las 19.00 en el Klub de Anadolu en Büyükada.
