En indomos de Ortaköy verso Sarıyer, kaje en medyo del kamino se topa Kuruçeşme. Kaminando al bodre de la mar, vemos en las alturas aryentro de los arvoles una kaza kolorada. Esta kaza se ve muy estranya. Parese ke los sidimes van a abashar i las papasyegas, van a bolar del shato de Gargamel.
Esta kaza aparteniya a un famozo arkitekto judio, Bruno Taut. Oy meldi en los jurnales ke esta kaza esta en vendida, kon el presyo de 95 milyones de Liras Turkas. El nombre del patron aktual esta sekreto.
Bruno Julius Florian Taut, nasyo en el anyo 1880 de padre i madre judios en la Alemanya. Estudio en la Eskola Profesional de Konstruksiyon de Königsberg. Kuando eskapo Bruno su edukasyon, lavoro al lado de munchos famozos architektos i izo buena eksperiensa en Art Nouveau. Avriyo su propria ajensiya en 1910.
En los anyos 1921-1932 lavoro en Magdeburg en el konsilyo de konstruksyon i en Berlin GEHAG. Bruno amostro su talento de arkitekto en kontruyendo en Berlin una site de kazas en forma de nalcha. En el anyo 1930, lo izieron miembro de la Akademiya de Arte. Resivio el titolo de “Miembro Onorario” de la Asosyasyon Enternasyonala de Arkitektos del Japon”.
En la Alemanya kreo un projekto muy teknolojiko. I ansina fue ke el kon su ekipo fraguaron mas de 12000 kazas. Lavoro en la Rusiya un anyo i kuando torno ya no era mas posivle de bivir en Alemanya. Se fuyo en primero a la Suisa, despues al Japon.
La Turkiya le propozo el posto de profesor de arshitektura en la Akademiya de Estado de Artes Plastikos de Estambol. Se enstalo en la Turkiya en 1936. Eskrivio munchos livros. Lavoro sovre munchos projektos.
Entremientes se fraguo esta kaza para si en las alturas del Bosforo en Estambol. Esta fragua kolorada es una konstruksyon maraviyoza. Es fraguada kon stilo turko i enspirasyon Japoneza. Los techos paresen a los techos de una pagoda. En el kat de alkavo teniya su buro, kon djames en todas las partes. Se ve el entorno en 360 grados. Esta kaza es fraguada ensima de kolonas, se suve kon un funikular. Taut no se la pudo gozar esta kaza ke la fraguo kon grande entusiasmo.
Bruno Taut fraguo la fakulta para el Ministerio de Edukasyon i munchas fraguas en Ankara en Izmir i en Trabzon. Ma la mas famoza fragua es la Fakultad de Linguas, Istoria i Jeografika, en la Universita de Ankara.
Kuando muryo Atatürk, lavoro para el proyekto del katafalko ande ivan a meter su puerpo en el Muzeo de Etnografiya. En 36 oras eskapo este proyekto ke plazyo a todos. El governo le kijo dar 1000 liras de rekompensa. Ma el lo refuzo i kijo solo una letra de remersimientos.
En okupandose kon el katafalko se yelo i aferro pnomoniya i a la edad de 58 peryo su vida.
Lo enterraron al simeterio “Edirnekapı Şehitliği” ke es un simeterio ande enterran los ke se mueren en las gerras. Es el solo non-muzulmano ke fue enterrado en este simeterio. Tiene una laja en forma de un kapak de sarkofago. Una koza ke no se save asta agora: Ke es el simbolo de la forma de una patada ke se topa ensima la laja?
