El livro Bereshit es el primer livro de los sinko livros de la Tora. La primera perasha es nombrada la perasha de Bereshit i trata de la kreasyon de el mundo, de la kreasyon de el ombre. El biervo Bereshit sinyifika “en presipyo” antes de todo i nos da a entender dizyendo, "antes de todo es ovligado el ombre de saver i tener la kreensa ke el Kriyador kriyo el mundo i todo lo ke apartyene en el. En la kreasyon de el mundo primera dicha de el Kriyador fue “I disho el Todo Poderozo a la luz, ke alelumbre a el mundo, i la luz kon el orden de el Kriyador alelumbro a el mundo. Dunke el mundo estava en una eskuridad, kon la kreasyon de la luz, de parte de el Todo Poderozo, se alelumbro el mundo. A el Kriyador le plazyo muncho la luz ke kriyo. Nuestros savyos a la Tora dizen ke es una luz grande Tora zo, Ora. La Tora es una luz grande ke aklara a la persona, la aze andar en kaminos djustos. Komo vensyo la luz a la eskuridad, tambien la luz vense a la inyorensa. Ansi en sesh diyas, kompleto el Santo Bendicho El la kreasyon de el mundo, ma el eskopo de el Kriyador era de aregalar a el ombre este mundo ermozo. Finalmente en el sejen diya, Erev Shabat, kriyo a el ombre i le disho a ti te kreyi porke te aproveches de este mundo; deves de konservarlo i no danyarlo. Tambien kriyo el Kriyador a la mujer i la nombro Hava. El Todo Poderozo, kon una dicha ke diziya, se kriyava todo lo ke enveluntava. Por esto es dicho en Pirke Avot, "Baasara maamarot nivra a olam", kon dyes dichas se kriyo de parte de el Kriyador el mundo. Ma kuando el Kriyador kriyo a el ombre dize, "Naase adam", kriyaremos un ombre.
Kuando le estava diktando el Kriyador a Moshe Rabenu la Tora por eskrivirla, Moshe Rabenu dize a el Todo Poderozo: tu sos uno; porke dizes de eskrivir "Naase", azeremos? El Kriyador le responde dizyendo, porke se enbezen todos de tomar idea afilu el grande de el chiko dunke nos enbezamos de este verseto de la Tora ke malgrado ke es savyo i grande puede tomar la persona idea de un chiko.
