Keridos Lektores,
Si tenemos un amigo intimo en la vida, kale ke mos syentamos mazalozos. Si tenemos dos aliados, semos muy mazalozos. Si tenemos tres aliados, kale pensar ke mos estamos yerrando i pasar de muestro ojos todos muestros aliados.
El punto el mas sublimo de las relasyones de los umanos es la amista. La amista es un kontakto limpido, sano i valorozo, muy presyozo.
Kualo es la amista? La relasyon ke se fonda kon el aliado.
Ken es el aliado? Es la persona ke puedemos kedar desmudos allado de eya!
El aliado es la persona a ken puedemos avrir muestro korason sin refujyarmos detras de kualker koza. El aliado es el ke esta al lado de muestras ansyas, atagantos, verguensas, akontesimyentos i kulpas i mira de topar solusyones para puedermos salvar de esta situasyon ande mos topamos.
Puedemos kontar todos los sekretos a muestro aliado, todos los sentimyentos ke mos erguelen, ke mos azen gritar, ke mos eksitan i ke mos azen yorar. Puedemos riyir u yorar komo keremos allado de el. El aliado mos oye solamente, mos da esperansa i aze todo lo ke puede para melizinarmos. No mos djuzga, no mos kondana ni mos akuza. Se inyerva, mos grita, ma nunka no mos ofende.
Ma no mos olvidaremos ke la amista es de parte a parte, resiproko. Si estamos puedyendo komportarmos de la mizma manera kon el, la amista akel tyempo es una amista immortal. Komo es muy difisil de fondar esta relasyon, es muy difisil de topar un aliado.
Un amigo ordinaryo, no save el nombre de muestra madre i padre. Aserke la aliada verdadera tyene los numeros de telefonos de muestros paryentes. Kuando envitamos a una amiga ordinarya, eya vyene kon un bokal de vino. Aserke la aliada verdadera vyene a ayudarmos para la envitasyon, para aparejar, meter la meza i azer el fregado i mizmo prepara en su kaza unas syertas kozas para alivyanar el kargo de la balabaya.
Un amigo ordinaryo se desrepoza si lo bushkamos kuando esta durmyendo. Aserke el aliado mos demanda deke no lo bushkimos tanto tyempo.
No kale mesklar el amigavle, kon la amista. Para pueder kreer una amista ke tyene raizes fuertes, kale dar emportansa a la kerensya. Para kerer byen kale tener el entendimyento i kale entender la mirada del den frente.
La kerensya es pueder asosyar dos karakteres diferentes, kon un chiko esforso, pueder azer trokar la persona a un sentimyento i entendimyento en medyo. La kerensya es una egzistensya ke nase kon mozotros i progresa de diya en diya. Para bivir la kerensya kale ser sinseros, frankos i entimos. La kerensya es la verdad, la buendad, la ermozura, el entendimyento, la armoniya.
En la natura se puede topar la fuersa de la kerensya. La armonia kon la natura, la armonia kon las personas aseguran la armonia kon el mundo. La kerensya es la vida, i la vida es el refleto de la kerensya. La rikeza de una persona es en primero la sanedad i despues tener mas de dos aliados en el entorno, para pueder bivir orozos.
Yo termino mi eskrita, en ogurandovos keridos lektores sanedad, i munchos aliados ke veramente vos keren byen...
