Facebook aktualizo sus reglas, el dodje de Oktubre, para prohibir los kontenidos en Facebook ke inyegan o distorsen el Olokosto, despues ke durante anyos permetyo ke la djente inyege lo ke afito en el Olokosto.
Esta desizyon reverso los byervos ke Mark Zukenberg aviya dicho en una entrevista en 2018. Zuckenberg aviya dicho ke el no kere ke Facebook seyga un arbitro de la verdad.
“So judyo, i ay un grupo de personas ke inyegan el Olokosto. Esto topando esto profondamente ofensivo. Ma, no kreygo ke muestra plataforma deve eliminar esto, porke ay kozas ke van a ser mal entendido" aviya dicho Zukenberg.
En una publikasyon de Facebook, vimos ke el pensamyento de Zuckerberg troko: “Kombati muncho kon la tansyon entre defender la libertad de ekspresyon i el danyo ke estan azyendo la djente en inyegando el Olokosto. Mi propryo pensamyento troko en vyendo ke este modo de publikasyones estan kavzando ke la vyolensia antisemita ogmente de diya en diya".
La vis prezidente de politika del kontenido de Facebook, Monika Bickert, disho ke trokaron de stratejiya vyendo ke el antisemitizmo esta ogmentando i este modo de publikasyones estan alarmando el nivel de la inyoransya de la manseves sovre el Olokosto. "Ya eliminimos las publikasyones ke estan alavando los krimes de odyo i los asasinatos durante muncho tyempo. Kon la mueva regla, las personas ke van a bushkar el Olokosto en Facebook, van a ser dirijadas a sityos de ande van a pueder obtener enformasyon korekta".
Los grupos de los derechos siviles estan kontentes de esta desizyon ma estan kestyonando deke esta desizyon se dyo agora. "Estan dizyendo ke la desizyon de Facebook de adaptar una atitud kontra la negasyon i la distorsyon del Olokosto, esta afirmando las koneksyones de Facebook kon la komunidad judiya durante el anyo pasado", disho el direktor de la ADL, en una deklarasyon. "Ma, estamos kestyonando deke esta desizyon se dyo agora i no en los mueve anyos ke pasimos".
Mark Zuckerberg siempre ensistyo de defender la libertad de ekspresyon. ‘La mijor manera de kombatir el negro diskorso es el buen diskorso’ el siempre diziya.
Ma estas muevas reglas estan amostrando ke Facebook agora empeso a akseptar ke se deve de ser mas proaktivo en el kombate kontra el diskorso de odyo.
El boykot de las publikasyones en el mez de julio, tambyen ayudo a desidar ke ay mas munchas kozas de azer para kombatir kon el diskorso de odyo. Miles de milyones de personas en el mundo entero estan utilizando las platformas kombinadas de Facebook i Instagram, ke es tambien propiedad de Facebook.
La influensya de estas platformas deve de ser utilizada de manera responsable, i Facebook ya aksepto esto.
Los kritikos estan dizyendo ke estas reglas no se estan aplikando bastante presto. Parese ke esto esta prevenyendo de la influensya del rejim vyejo ke syempre defendyo la ekspresyon de liberdad.
