Andre Aciman es profesor de literatura en Harvard, Princeton i otras universitas famozas de los Estados Unidos. El, tanbien eskrive artikolos en las gazetas las mas prestijiyozas del mundo i publiko kuatro livros en Fransia. En su livro, “Adieu Alexandrie” eskrivio Aciman sus memoryas donde konta la vida de su famiya ke emigro de Estambol a Ejipto i konta komo fueron ekspulsados o arondjados de Ejipto en el tiempo del prezidente Naser.
El onkl Vili, las dos gramamas i la tant Flora son los personajes prensipales del livro. La una gramama era entre eyos “Prensesa” i la otra era “Santa”. Eyas avlavan sesh linguas. La tant Flora era vinida de la Alemanya.
En esta istorya estamos viendo un manseviko de 14 anyos nasido en una famiya frankofona de Ejipto. Era djusto la edad ke teniya ideales de tener una vida mijor. En este tiempo fueron ekspulsados de Ejipto. Se fueron a bivir a la Italia, de aya a la Fransia, para irsen despues a los Estados Unidos, ande Andre Aciman izo su kariyera, ke vos konti en el empesijo.
El livro es muy godro, ma yo vos va kontar solo el kapitolo konsakrado a la nochada dalkavo en Alexandria, ke Aciman la yamo “El Ultimo Seder”.
Malgrado ke se estava asperando ke el governo iva arondjar a todos los etranjeros i siguro a los judios, el tiempo de la deklarasyon fue un grande golpe para su famiya. Fueron ovligados de vender i likidar una partida de sus bienes (kere dizir lo ke pudieron) por un bokado de pan.
El diya ke eran ovligados de abandonar el payis koensido kon el primer diya de Pesah de akel anyo.
Toda la famiya teniya una piedra en el korason. Ma malgrado esto, las mujeres de la famiya ke eran, la madre de Andre, la nona i la tant Elsa kijeron azer el Seder de Pesah. La meza fue aprontada kon un mantel brodado i dos kandelares de valor. Las mujeres se vistieron sus fostanes de dantelas, metyeron sus djoyas i los ombres se vistyeron sus kostumes.
La madre de Andre topo un pan sin levadura del orno ke merkavan pan de anyos. El ornero ke era konosido ya entendyo el kavzo i les disho kon boz basha “Bon Pesah”. El padre de Andre meldo la agada komo kada anyo. Andre se akodro a un momento de los miembros de la famiya ke no estavan mas en vida, komo se despasensyavan i diziyan “ayde melda mas presto, mos vamos a murir de la ambre”.
Djusto en medyo de la agada vino el moso de anyos i les disho kon espanto ke ay un telefon de la polisiya para deklararles la ekspulsyon. El padre de Andre ke mas no teniya espanto, les disho ke estavan en medyo de la orasyon i no puediya responderles. Despues ke ya eskaparon de komer los bimuelos i las komidas tradisyonalas de la fiesta, pasaron al salon a oyir el disko de Beethoven ke aziya “Loores al Dyo”. Todos teniyan una dolor en el korason de salir de sus payizes ande bivieron i ke amavan.
Ansi se eskapa la vida de tres jenerasyones de la famiya Aciman en Ejipto.
