Eden ISRAEL
El diya 11 del mez Heshvan es el Hilula de Rahel Imenu, muestra amada madre, la madre del puevlo djudio. Rahel era la esposa mas kerida de Yaakov. En 5780, estuve en la tumba de Rahel, el Kever Rahel en ivrit. Mientras sentia una koneksion profunda, ize mis tefilot, i oy emosionalmente desidi eskrivir este artikolo por su merito.
“Se oye una boz en los syelos, lamento i yanto amargo, Rahel yora por sus ijos, eya se niega a ser konsolada por sus ijos, porke eyos no son. Asi disho el Senyor:
Absten tu boz de yorar, i tus ojos de lagrimas, porke ay rekompensa por tu lavoro, i tus ijos volveran a su territorio.” Yirmeyahu 31
Desde el momento en ke el puevlo de Israel fue a su primer egzilio asta la profesiya de redension de Yirmeyahu (“i tus ijos volveran a su territorio”), el Kever Rahel syempre ha sido i syempre sera una kaza de orasion para Israel, porke eya es una madre para todo Israel, i syempre despierta miserikordia en su favor.
Kada anyo, sientos de miles de djudios i non-djudios van a vijitar la tumba de Rahel. Es un lugar muy espesial para ke una persona, ombre o mujer, se sienta eskuchado, amado i akseptado inkondisionalmente.
Asigun el Rav Yitzchak Ginsburgh, en su artikolo en el sitio yeshshem.com, “volver a su territorio” se refiere al regreso del puevlo djudio a la Tyerra de Israel. Pero, mas profundamente, se refiere al regreso de muestro puevlo a muestro entorno espiritual natural: el djudaizmo i muestra naturaleza djudia ansestral. Es eso ke aze verdaderamente la singularidad de muestro puevlo de Israel.
La unika ke meresio la atension de Ashem fue Rahel Imenu. Eya dio los simanim a Lea, su ermana, i ayudo a enganyar a Yaakov. Kon esta valentia, en su mente, estava saboteando la istorya de la nasion djudia ya ke entendio ke eran eya i Yaakov los ke estavan destinados a konstruir la nasion de Israel.
Sin embargo, eya elijio deshar de lado su propio destino i el gran plan de Ashem para salvar a su ermana de un solo momento embarazoso. Solo Rachel, ke teniya un konosimiento tan profundo de la dolor de otra persona i de komo tyene mas pezo ke toda la eksperiensya djudia, puede ser la emisaria de Ashem para yevar la dolor de sus ijos ante El. Solo las lagrimas de Mama Rashel pueden traer la Geula.
Ke las lagrimas de Rashel mientras yora por mozotros en el egzilio se troken por lagrimas de alegriya mientras mos reunimos en la redension. Ke sea oy!
Shabat Shalom, Keridos Lektores!
