Los diyas de alkavo denverano son tristes. La kolor de las ojas trokan, de verlas en basho arastando me aze pena, los diyas akurtan i se aze presto aleskuro i esto me da tristesa, ma una koza me da konsuelo i digo si no vyene otonyo no vyene primavera, si no vyene invyerno no vyene enverano.
Este enverano para mi paso un poko monoton. No me va keshar, bendicho el Dyo, a la kampanya me fui, a la mar entri, lo mas ermozo vide djente i amigas, tomi aver limpyo. Para todo loores al Dyo, ma komo so auzada a tener aktividades, lo djusto, munchas kozas me vinyeron a mankar. Seya los konseres del koro NES, seya el AVRUPA YAHUDİ GÜNÜ ke uzo kada anyo a echar tallet en la boda ke prezentamos, ya empeso en medyo el enverano a pensar kualo me va vistir, ke kolor de chapeyo me va, lo mas triste fue los aparejos de un TEATRO MUEVO. A pesar de todo, yene no me estuve keda, a un safek eskrivi una piesa para el Diya Internasyonal del Ladino ma el Dyo lo save si se va realizar.
Pensando komo va pasar este invyerno, tomi un telefon de un manseviko, un direktor de sinema, nombrado SAMİ MORHAYİM. Kon una boz muy dulse me disho ke va travar un filmo de kurtometraje para un festival, ke tyene de menester de un rolo de gramama. La verdad dizir en primero me mareyi, le demandi de ande me topo i deke yo?
Me dyo a entender ke avlo kon İZZET BANA i ke le disho FORTİ BAROKAS te puede ayudar. Sin pensar muncho le dishe kon grande plazer te ayudo. Es verda ke ay anyos ke djugo en los teatros ma en un filmo no se si va parvinir. Kurto en supito una demanyana a las 7.30 me topi en un platform de sinema kon un teksto en la mano, kon kameramanes, kon un ekipo teknik, luzes, kuafor i makiyoz. Lo mas enteresante kon dos djugadores profesyonales ke djugan en teatros i seriyas de televizyon.
El nombre de el filmo: “SUSAM”!
El sujeto: una demanyana de Shaba,t la famiya se estan aparejando para ir al kal ke tyenen barmitzva del ijo presyado. Ma el ijo se serra en su kamareta i no sale. La famiya entera penan para kitarlo, todos preokupados ke ya kedaron tadre.
Tyempo: 20 puntos
Djugadores: FATİH AL el padre
FERİ BAYCU GÜLER la madre
EYLÜL la ermanika
İZZET BANA el granpapa
FORTİ BAROKAS la granmama.
Te rengrasyo SAMİ por esta ermoza aktividad ke para mi fue una eksperiensya enorma, te oguro syempre ke vayas adelantre i reushita buena!
