Kualo es una kapsula de tyempo? Un resipyente ke kontyene una kuantidad de objektos, efektos eskojidos komo tipikos de akel tyempo prezente, i guadrados o enterrados para ser deskuvyertos en el futuro.
Una kapsula de tyempo djudia guadrado, ke data de kaji 150 anyos antes, fue deskuvyerta durante los lavoros de restorasyon en la antigua Sinagoga ande se topa el Muzeo Djudio de Manchester.
Los lavorantes toparon la kapsula de tyempo - un katramis grande de vidro i estampiyado, yeno de dokumentos, gazetas i jurnales i una chika kantitad de moneda- eskondido en la pared serka del arko del edifisyo, katalogado sito istoriko de Grado II ke es la antigua sinagoga espanyola i portugeza, ke se serro para las orasyones relijyozas en 1983.
"En derrokando la pared, toparon una kapsula de tyempo perfektamente intakto desde 1873!" disho el Muzeo en un Tweet. "Es un milagro ke pudo sovrebivir tanto tyempo, i estamos despasensyados para ver i ambezar mas sovre esta kapsula!"
El sityo web ofisyal “Visit Manchester” de la sivdad informo: El katramis de vidro, kon su estampiya de kandela intakto, fue deskuvyerto por los lavorantes eskondido en una kavidad profonda de la pared serka del arko del Muzeo […]. Yeno de monedas, papeles de la sinagoga i periodikos, estos artefaktos orijinales datan de la epoka kuando se fundyo la Sinagoga por primera vez en 1873. Las primeras aktas eskritas i rejistros de la Sinagoga sinyalan la enstalasyon de la kapsula en la pyedra angular del edifisyo orijinal.
Unas kuantas enformasyones sovre el proyekto de engrandesimyento del Museo Djudio de Manchester: El muzeo, el uniko Muzeo Djudio de la Inglatierra afuera de Londra, se avriyo aryento de la Sinagoga en 1984. Se serro el anyo pasado, en 2019, para un engrandesimyento i renovasyon. Ansi su espasyo se va anchear mas de dopyo, se va avrir mas galeriyas i se va renovar la ekspozisyon permanante. El muzeo resivyo una subvansyon de la Loteriya Nasyonal de 2,89 milyones GBP para el ambisyozo proyekto de engrandesimyento i de renovasyon kon un budjeto de £5 milyones i se espera ke el muzeo va avrir sus puertas en el otonyo de 2021.
El Muzeo disho ke la kapsula tomara su parte en la mueva ekspozisyon.
Los dirijentes del Muzeo yamaron este deskuvrimyento "Una topada muy sinyifikante porke este fin de semana es Yom Kipur, un dia en el kual las komunidades djudias miran atras, al pasado komo un medyo para mirar adelantre".
El jurnal The Guardian en su novela sitó el chef del sityo de konstruksyon Adam Brown deskrivyendo el deskuvyerto: “Izimos muncha atansyon en derrokando la pared, ma nunka no imajinimos ke ivamos a topar un reliko tan viyejo, un reliko del tyempo de la fragua del edifisyo i ademas intakto. Esta deskuvyerta kreyo muncha emosyon en el sityo. Es klaro ke se metyo muncho tyempo i atansyon en metyendo la kapsula 150 anyos antes. Toparlo en kondisyones perfektas fue reelmente un premyo, una rekompensa de una grande valor.”
Adaptado de los artikolos del “Jewish Heritage Europe” del 27 Septembre 2020 i del jurnal The Guardian del 24 Septembre 2020.
