Es Alhad el 25 de Oktobre ke el Muzeo Djudio d’Estanbol organizo el Diya Evropeo de la Kultura Djudia. Ya savesh ke no era muy kolay de organizar evenimyentos komo los anyos pasados. La Korona mos esta limitando en todos los kampos. Mizmo para el Muzeo. I este anyo organizimos un alay de programes para el sitio internet del Muzeo kon un grupo de dammas enkavesada por la sinyora Eda Levi. I estas dammas reusheron a realizar todas estas aktividades. Es posivle de segir estos programes en el sitio del Muzeo: www.muze500.com. Ya puedesh segir mizmo el konserto de İzzet Bana kon las Estreyikas d’Estambol un mez entero. El 25, el solo evenimyento ke fue realizado fue este konserto. Este konserto de 75 puntos era la presentasyon del CD i DVD ke fue echo dos mezes antes. İzzet, kon su pasensya, eduko kuatro muevas kriaturas (ijos i ijas) para remplasar los ke no kijeron estar en la shena en esta epidemia. İzzet es korajoso i no se espanta de lavorar en este kampo para edukar muevas kriyaturas mizmo si tyene un mez para el konserto ke era programado. Mizmo los muevos miembros fueron muy reushidos. İzzet en este album lavoro kon las dichas i los refranes de las kriaturas i las kantikas sovre las fiestas. Es por la primera vez ke interpretaron una kantika sovre la Gerra de Çanakkale, ke fue en 1915 ande munchos soldados turkos (de todas las relijiones, gregos, ermenis, musulmanos i djudios) fueron matados por los inglezes i los fransezes.
El diya de alhad la segunda aktividad era los tures turistikos. Se organisaron 8 tures. Devo de rengrasyar los prezidentes i dirijentes de las Sinagogas Neve Shalom, Ashkenazi, Italyana i Schneidertempel ke avriyeron sus sinagogas para este diya. El Orno de Matsa, ke no funksyona mas, ande el orno esta dainda aya fue vijitado por munchos grupos i los ke vijitaron estavan kontentes de ver una makina, un orno asemejante. No savian ke avia un syerto tyempo para pueder produsir una matsa “kasher”. Se ambezaron ke dimos karar de emportar de otro payizes para no tener problemes halahikos i problemes kon los lavorantes. En Israel esta produksyon de tres mezes se esta realizando solo en unos kuantos diyas. El orno era una eksepsyon.
Munchos mos demandaron ande se vende esta matsa. I mos ambezimos ke eran djente ke no biven en un kuartier ande se topan djudios. Avli kon tres diferentes personas. La primera era de Şehremini, kuartier ande no bive Djudio. La segunda era de Kartal, kuartier de la parte asiatika ma muy leshos de los lugares ande biven los Djudios. I la tresera era una ke biviya en Bahçeşehir. Muevo kuartier a 40 kilometros del Sentro de la Sivdad. Reelmente enteresante. Avia uno ke vino de Edirne, de la Universitad de Trakya i esta azyendo una teza sovre los Karaimes. Una otra damma ke me estava bushkando para demandar mis ideas, esta azyendo una teza sovre los tornos ke se puede realizar en Estanbol sovre la Erensia Kulturala Djudia. I esta lavorando en la Universitad de Kastamonu. Ke kozas enteresantes. Avia dos otros profesores ke lavoravan en la Universitad de Derecho de Estanbol i ke no estavan kontentes del giador. Entre los 125 musafires se topava solo sinko o sesh djudios. Estuve muy kontente de ver esto. Muestro buto es en primero de ver personas ke no mos konosen, ke no konosen los Djudios i las Sinagogas ande los Djudios azen sus orasyones.
El segundo punto es ke por estos tures las kompanyias embiyaron 13 giadores para ke se ambezen lo ke se konta en estos tures. I mozotros reelmente estamos kontentes de esta situasyon. El mizmo diya teniyamos un segundo torno: “el Galata de Camondo”. Malorozamente no pudimos realizar este torno porke no teniyamos bastantes personas ke se enteresaron. De ke no se enteresaron, no savemos. Muestra direktrisa Nisya mos esta avertisyendo dizyendo ke devemos de azer tornos Djudios ma en diferentes kuartieres komo Balat, Hasköy i Kuzguncuk…
Eskapimos este diya kon una buena vendida de livros. Es muy emportante para mozotros. Porke estas personas topan munchas kozas para meldar sovre los Djudios en jeneral i los djudios turkanos en partikular.
Espero ke en 2021 vamos a realizar el Diya Evropeo de la Kultura Djudia kon 2.000 o 3.000 personas komo el anyo pasado.
