En Azerbeydjan, las sinagogas estan serradas por modo del koronavirus.
La semana pasada, una sinagoga tomo un permiso espesyal para avrir sus puertas, para rogar por la viktorya de su payis en la gerra kon Armenia.
"Estamos rogando ke no ayga dingun firido", disho en una entrevista Shneur Segal, grande rabino de la komunidad Ashkenazi de Baku, i emisaryo del muvimyento de Habbad.
Nagorno-Karabaj, situado al norte de Iran, entre Azerbeydjan i Armenia, es la razon de la gerra entre los dos payizes. Kado uno, esta reklamando ke Nagorno-Karabaj apartyene a su payis. Este konflikto estuvo kontinuando desde 1992, despues ke Rusya se separo en munchos estados.
Los vente i ocho anyos de konflikto fueron motivados por siglos de disputas sovre "ken va kontrolar esta rejyon".
Shusha es konsiderada komo una sivdad de emportansa por los azeris i los armenios. Los azeris estan dizyendo ke Shusha, (en el norte de la rejyon), es una sivdad de emportansa nasyonal i istorika, porke Shusha fue un sentro de la kultura azeri antes ke el emperyo ruso konkiste esta area.
“Estamos rogando por kada soldado de muestro payis”, disho Segal durante el servisyo.
En la kapital de Armenia, Erevan, los djudyos armenios estan dizyendo ke Armenia tyene razon. En Armenia, biven solo 500 judyos. Azerbeydjan tyene una komunidad djudiya grande i diversa de 30.000 judyos.
Azerbeydjan es el solo lugar afuera de Israel i New York ke tyene una sivdad totalmente djudiya. Qirimizi Qeseba, a las vezes konosido por su nombre ruso, Krasnaya Sloboda, es una rejion de los "djudyos de las montanyas" de Azerbeydjan, ke bivyeron aya desde el siglo VIII A.C.
Allado de los judyos de las montanyas ke konstituyen la majorita de la komunidad judiya de Azerbeydjan, tambien ay una komunidad emportante de judyos georgianos i judyos ashkenazis ke se inkluyeron durante los diyas ke Azerbeydjan era parte del Emperyo Ruso i, mas duspues, de la Union Sovyetika. El rabino Segal estimo ke ay entre 6.000 i 7.000 judyos ashkenazis en Azerbeydjan.
“Los judyos bivyeron aki durante tanto tyempo, i todos en la komunidad se syenten parte de la sosyedad lokal. Estan tristes por modo de esta gerra. Los ijos de munchas famiyas judiyas se fueron a la gerra, estan luchando komo sidodanos de este payiz, i mezmo los padres ke servyeron en la armada fueron yamados komo dover de rezerva’’.
No es la primera vez ke los judyos de Azerbeydjan se estan espantando por sus ijos en Nagorno-Karabaj.
Albert Agarunov, un judyo azerbeydjano ke muryo kombatyendo en Shusha durante el primer conflikto de Nagorno-Karabaj en 1992, esta rejistrado komo uno de los eros nasyonales de Azerbeydjan.
Albert Agarunovich Agarunov, un judyo de las montanyas de Baku, esta rejistrado en la lista de los eros nasyonales de Azerbeydjan i los politikos lokales lo estan konsiderando un ero de gerra.
Los judyos azerbeydjanos ke estan bivyendo afuera del payis tambien se estan enkiyetando por modo de esta gerra. En Israel, en enverano, kuando wmpeso los primeros enfrentamyentos en Nagorno-Karabaj, 600 judyos azerbeydjanos-israelyanos kaminaron enfrente del Sentro Kultural Armenio en Yaffa. Los manifestantes gritaron: "Biva la nasyon Israel, biva la nasyon Azerbeydjan’’
