İsak Eskinazi / Saver Es Bueno
En las mitolojiyas, munchas kozas fueron konsideradas komo sagradas. Para munchos puevlos, el arvole simboliza la “vida” kon las raises ke van a muestros antepasados i kon las ramas ke simbolizan las jenerasyones.
Este “Arvole de la Vida” se ve mas i mas en el arte de la pintura, de la skulptura en siertas ovras arkeolojikas i en varios otros kampos.
El arvole por su magnitud fue tambien un objekto de orasyon. El simboliza entre munchas otras kozas la immortalidad. En invierno la mayoriya de los arvoles piedren sus ojas, i en enverano nasen de muevo.
En munchas kulturas el arvole toma un rolo divino ande siertas personas atan ilos o trapos para realizar sus dezeos. El arvole tiene una fuersa kozmika para algunos puevlos i es dizir ke te da la sensasyon de unirte al kozmos, al universo spiritual.
El arvole kon sus ramas fue la primera eksperiensya para azer el fuego, el arvole sirvyo para mantener el kapuyo ke da la seda, sirvyo para darmos frutas freskas i sekas, sirvyo para azer kazas i barkos. Asi tuvo una multitud de utilidades ke el umano se sirvyo por siglos i kontinua de mizmo sirviendose en muestros diyas.
El arvole tambien se simboliza en la Menora i en la Hanukiya. Kon las 7 ramas da luz a la umanidad i kon las 9 ramas mos aze akodrar la libertad.
“El Arvole de la Vida” sirve a ayudarte a la union virtual kon el Sielo. El Sielo ke tambien simboliza el “Gan Eden”.
El arvole kos sus raises debasho la tierra, kon su puerpo ensima la tierra i sus ramas ke se aserkan verso el siyelo simbolizan el pasado, el prezente i el futuro.
En la Mitolojiya Grega, Apollo se ennamora de Dafne, una adolesente muy muy ermoza. Apollo kere aferarla i eya se fuye de el kon todas sus fuersas. Dafne viendo ke no ay manera de salvarse de Apollo roga a Zeus de salvarla. Zeus ayuda a Dafne i la abolta en un arvole. En la mizma mitolojiya el arvole de Roble (meşe) es el simbolo del Arvole de la Vida. I Dafne es el arvole (defne) ke da sus ojas para azer las Koronas de los Emperadores i ojas tambien ke son aromatikas i melizinas para siertos males.
En el “Bereshit” enkontramos el “Avole de la Vida” ke esta al lado del arvole del “Konosimyento del Bien i del Mal”. Estos dos arvoles estan en “Gan-Eden”. Ansi se puede dizir ke esta nosyon del “Arvole de la Vida” esta tambien en muestra kultura.
Los arvoles ke pueden ser komparados kon el “Arvole de la Vida” son los ke kedan siempre vedre, los arvoles ke son grandes i ke biven invierno i enverano, komo el Sipres (selvi), komo el pino (çam) o el Platano (Çınar). Estos arvoles simbolizan la eternidad, el sagrado i la divinidad.
La importansya de la eternidad se nota tambien en nombres de siertas Kehilot komo la kehila de Ortaköy ke se yama “Etz a Hayim” ke kere dizir “Arvole de la Vida”. El umano siempre tuvo esta esperansa de pareser al ”Etz a Hayim”.
El “Arvole de la Vida” simboliza la ‘Hohma’, la serenidad i la paz. El simboliza la kreasyon i las raises de la vida. Simboliza el renasimyento i el desvelopamyento del umano. Simboliza la jenerozidad ofresyendo sus frutas, su sevada, su tavla. Sus ramas dan una sensasyon de seguridad i su tronko simboliza la proteksyon. Simboliza la fuersa i la ermozura de la Natura. Simboliza la kontinuasyon de la Umanidad.
