Alguna vez pensatesh keridos lektores kualo sinyifikan las palavras solas?
Para mi no tyenen dinguna valor. Kada elemento reprezenta una idyoma, ma, kuando se konvierten en palavras son un poder illimitado.
Komo disho “Konfichyus”: “Sin entender el poder de las palavras, no puedesh entender el poder de las personas”.
Si demandamos deke?
Ay momentos ke las palavras mos azen espantar. En vezes, son komo balas de plomo. En vezes kale topar el buto djusto. Todas las palavras son balas de plomo en realidad. En vezes son la kavza de una lucha, de una gerra. Vyene un momento ke las palavras mos orientan a la amisdad. En primero dan boz en muestro meoyo, despues en muestro korason sintimos kon kayentor, kon pasyon, kon senseridad... Mos kantan el amor, eyas mos toman la kavesa, mos dan esperansa, mos eksitan… Vyenen momentos ke las palavras mos komunikan las bozes de muestros korasones. En vezes kon kayades, en vezes kon gritos…
Las palavras pueden trokar muestra vida positivamente u negativamente.
Por esto kuando uzamos las palavras, kale ke agamos atansyon no a muestro korason ma a la boz de muestro meoyo.
“Shakespeare” dize: “No emporta lo ke dizen los otros, ma las palavras pueden trokar el mundo”. Las palavras ke uzamos son el espejo de muestro karakter, de muestra egzistensya.
Yo penso ke kon los byervos ke utilizamos, estamos puedyendo ayegar al meoyo i a los korasones del den frente. I esto esta aminguando la soledad del mundo.
La palavra es una manera de eksprimirse, es una manera de tomar reflo, de echar afuera lo ke tyenes de bueno u de negro.
Kuando se avla lo ke se pensa, la persona se repoza, se trankiliza i el komporto, la atitud se troka en una forma negativa u pozitiva.
