El diya estava muy klaro, ma el ayre estava fuerte. Un ombre estava kaminando en el kampo, kon el paltiko enriva. El sol kon el ayre del syelo lo estavan mirando al ombre. El ayre le disho al sol, yo si asoplo muy fuerte se le bola el palto de enriva. El sol se riyo, no lo puedes azer, le disho, ma yo se lo puedo azer kitar de enriva. El ayre le disho, tu no tyenes fuersa komo mi, si keres mos meteremos a un bas, i ansina kedaron dakordo. El ayre empeso a aparejarse i kuando se izo pronto empeso a asoplar. Asoplo, asoplo, los arvoles empesaron a meneyarsen, se van a arankar del lugar, el ombre se empeso a yelar i mas muncho se lo serro el palto. I para no kayerse se detuvo de un arvole. El ayre vido ke no se va kitar el palto, desho el asoplar. El sol miro al ayre i empeso a riyirse, ya te dishe ke no puedes kitarlo el palto, i le disho, agora mirame a mi.
El ombre estava tan kansado ke se kedo durmyendo debasho del arvole. Despues de dyes puntos la kayntura del sol le vino a la kara del ombre i se le riyo la kara se repozo. Pasa unos kuantos puntos empeso a sudar el ombre i se kedo ovligado de kitarse el palto.
La fuersa, kon la negrerura no ganan siempre, ma la amistad i la kayntura de la alma gana todo el tyempo. I se avren todas las puertas.
