Mi esfuegro era nasido en Salonik. Kuando uvo el fuego grande de Salonik en 1917, el era dainda chiko.
La famiya morava en una abitasyon ke era kompozada de kuatro kazas ke formavan un kare. En este “blok” de kazas biviya la famiya entera. Los padres, las ermanas, las primas, las ermueras, las tiyas ets. En medyo de estas kazas aviya un kortijo ande se asentavan las mujeres, trikotavan, brodavan, beviyan kafiko, aziyan moabet. Los ombres djugavan tavli, kontavan sus rekuerdos, los ijikos i ijikas jugavan i korriyan kon alegriya. Komo todos eran paryentes, teniyan haber de lo ke se pasava en las otras kazas. Siguro ke aviya mas otros de la famiya, ke moravan en las kazas del entorno. Asigun me kontava mi esfuegra, komo lo mas de los judios de Estambol moravan al entorno de la Kula de Galata, los judios de Salonik moravan al entorno de la Torre Blanka.
Una de estas famiyas teniya una mosika ke se yamava Matildika. Esta mosika era el “telefon selular” de la famiya entera. La mandavan de kaza en kaza para tomar haberes de kada uno. Por egzemplo:
Matildika demanda a la tiya Benuta si ya le paso la dolor.
Matildika va toma haber si paryo la ermuera de Sunhula
O, tanbien la mandavan para dar haber.
Matildika dizele a Esterucha ke venga a bever un kafiko.
Matildika se iva ande la tiya Benuta i demandava. Tiya Benuta estas buenika buenika? Ya esto buena buena. Madam Esterucha estas buenika buenika? Ya esto buena buena. I a la fin de estas “vijitas” se dava haber a todos. La tiya Benuta esta buena, Esterucha esta buena, Sunhula tiene dolor de kavesa, el ijo de Rashel, Chelebon se kayo. I mas…
Una de estas famiyas ke moravan en este blok, teniya 9 kriyaturas. El uno el mas grande Davidiko era muy yaramaz. No puedesh imajinarvos las kozas ke aziya. Una vez, ato a un gato la rida de su padre kon espangos i lo echo por la ventana del treser kat. Disho ke era para ver si el gato iva abashar abasho kon parashut.
Un diya este Davidiko se metyo a peleyarse kon uno de los ijikos del kortijo. La mosa grega Eleni en kijyendo apartarlos, David kijo dar una tekme al amigo, ke le vino djusto a la tripa de Eleni. Eleni en dos kates entro a kaza. Ma afito una koza ke Eleni no pudo pishar diya entero.
Siguro le salyo motivo muevo a Matildika de estar koryendo de una kaza a la otra para meterles al koryente de lo ke paso. Kada medya ora se iva a demandar: YA PISHO ELENI? No! No pisho! Atyo ke se va azer? Se va murir si no pisha. Al otro diya yene Matildika se metyo en kamino para demandar el hal de Eleni i para dar haber al resto de la famiya. A la fin ya vino el haber, YA PISHO ELENI! Atyo haber grande. Una alegriya en la famiya entera i repozaron los korasones.
Esta dicha de 150 anyos antes, kedo en la famiya asta agora para demandar un haber ke esta tadrando de vinir.
