Las eskolas de L’Alliance Israelite Universelle (AIU) djugo un grande rolo en la modernizasyon de la edukasyon judiya en el dizimueven siglo.
Esta organizasyon fue una realizasyon de la konsensya judiya franseza. Los judyos de Fransya sintyeron la responsabilidad de ayudar sus korelijyonaryos kontra la asimilasyon. Ademas, la organizasyon franseza penso ke kale modernizar el stilo primitivo de la edukasyon oryantal del Imperyo Otomano, de Iran i de los Balkanes.
En el empesijo, fondaron la eskola ‘Ecole Israelite Orientale’ en Paris en el anyo 1867, i los buenos elevos de diferentes payizes fueron arekojidos i mandados a Paris para estudyar en esta eskola.
Las eskolas AIU davan grande emportansa a la lingua i a la kultura franseza, ma el ebreo, la Biblia i los otros sujetos no eran tan estudyados. Los elevos ke eskapavan estas eskolas saviyan el fransez komo en las eskolas fransezas. Estas eskolas fueron las primeras ke dyeron una edukasyon evropea en el oryente.
Munchos mansevos ke eskaparon estas eskolas fueron muy reushidos i se izyeron dirijantes de las komunidades judiyas.
Mas despues, las otras eskolas judiyas ke fueron fondadas en las komunidades judiyas fueron enfluensadas por el sistema edukativo de la AIU.
Las eskolas AIU eran muy otoriter. Sin dar raporto al sentro de Paris, los dirijantes no puediyan dar dinguna desizyon.
En el anyo 1868, la primeras eskolas AIU de Estanbol, fueron fondadas en Hasköy i en Kuskundjuk.
Komo en estos anyos no aviya una eskola para las kreaturas de las famiyas proves, los dirijantes de las komunidades de Estanbol se sintyeron responsavles i empesaron a okuparsen de eyos. Se adresaron a la AIU para ke les ayuden en la edukasyon de estas kreaturas i para protejar la manseves de la enfluensa de las eskolas misyoneras.
Los dirijantes de la komunidad judiya penaron muncho para ke se avra otras eskolas AIU en el Imperyo Otomano.
Kon el ayudo de Baron de Hirsh ke estava en Estanbol i kon el ayudo de un milyon de frankos, munchas eskolas AIU se avriyeron en el Imperyo Otomano. En Estanbol, en Balat, Dağhamam, Galata, Hasköy: afuera de Estanbol, en İzmir, Edirne, Kırklareli i en Çanakkale.
En el anyo 1912, aviya 71 eskolas de ijos, i 144 eskolas de ijas en el Imperyo.
Aparte de la edukasyon judiya, esta organizasyon se okupo de arekojer dokumentos del folklor i de la kultura judiya en diferentes payizes, i formaron emportantes arshivos.
Las eskolas AIU djugaron un grande rolo en el developamyento del puevlo judiyo. El puevlo judiyo se aklaro i se izyeron mas aktivos en el komersio i en los echos del governo en los anyos dalkavo del Imperyo Otomano.
Despues de la Gerra Mondyal, las eskolas AIU pedriyeron el kontakto kon el sentro en Paris, i a una a una empesaron a serrarsen.
