Ay unos kuantos diyas ke esto tomando haberes de amigos i konosidos ke aferaron este maldicho virus Covid19, ken esta en el ospital ken lo esta pasando en kaza. En todo kavzo ya vino a la puerta de todos. Es verda ke estamos salyendo a la kaye kon maskas, no mos estamos suvyendo a transportos publikos, no bodas, no vijitas, no sinema, no teatros ma para los medikos no es sufisyente sovre todo a la edad muestra. Rogaremos todos ke tengan refua shelema i tomaremos haberes buenos.
Kon esta ley mueva ke salyo para los de la edad 65+ i yo tomi una desizyon de no oyir haberes de televizyon, de no suivar programes de doktores i konsejos sovre la korona. Porke todos mos izimos spesyalistos de vitamines i mesklatinas organikas. Yo esto azyendo las tres “K” i esto muy kontenta. Vos konsejo. KANAPE- KOLONYA- KAVE! Agora un poko riyeremos.
En el tyempo de la sigunda gerra mondial, en Berlin, Albert kon İzak entran a un bar para pasar la ora i toman una bevyenda. Alber le demanda al amigo İzak deke esta dezesperado.
İzak: Ke dizes Alber, kualo mos van a azer los Almanes? Estamos en un estado muy negro, estamos medra.
Albert: No se İzak, ay dos posibilidades; u mos matan u mos yevan a los kampos de konsantrasyon.
İzak: Si mos matan medyo mal, si mos yevan a los kampos de konsantrasyon estamos medra.
Albert: En los kampos de konsatrasyon ay dos posibilidades; u mos azen shavon u papel u mos mandan a las kamaretas de gaz.
İzak: Si mos azen shavon, medyo mal; si mos azen papel ke afita?
Albert: Ay dos posibilidades; u mos azen papel periodiko u mos azen papel ijyeniko.
İzak: Si mos azen papel ijyeniko ke afita?
Albert: No demandes Albert, akea vez estamos medra!
