Yossi Yusuf Pinhas
Kuando empesi a lavorar en mi sigundo echo, de la manyana, mi padre me mando de la kaza en la puerta, bendiziendome. El estava muy alegre i orgulyozo. I yo me aviya metido mi mijor vestido ama sin kravata kon kalsados de lastik. Me akodro ke le dishe “ya’stas vyendo, me topi un echo ande no me azen meter kravatas.” I mi padre se riyo. El aviya lavorado en el buro por sinkuenta anyos i kijo ke yo lavore komo el. Ya ay munchos anyos ke esto dainda en el mizmo echo. Me plaze muncho lo ke ago, mi buro i los otros lavorantes. Kreyo ke ay solo uno ke se mete kravata aya. Me plaze ir al buro, i tengo mi meza yena de unos chikos suvenires, tefteres, porke paso kaji todo el diya aya. Asta el marso de 2020!
Ya ay kaji ocho mezes ke mos estan dizyendo ke kedemos en kaza. Friyo, inyeve, kalor, luvya, kuatro sezones, ni Kipur pudiyamos o no keriyamos salir afuera, ama es el anyo afamado de korona! I mas, estamos lavorando en kaza. Ken gano? Zoom, Google Teams, Skype. Ken perdyo? Patrones del buro. Ken gano? Los ke azen pijamas, eshofmanes i charukas. Ken perdyo? Los ke azen paltos i kalsados.
No se si esto mazaloso o no, ama no tengo munchas reuniones. Mi amigo en kaza teniya munchas, i en el enverano, verlo kon kamiza enriva i shortes abasho estava komik. Ya ay milyones de personas ke tienen de lavorar afuera en perikolo. Ama azer echo i lavorar en buros se trokaron profundamente. Agora es “home office”, laptop i “reuniones virtuales”. Ahora es topar en buena ora para los otros en la kaza ke se aviyan auzados de tener dingunos en kaza i gozar el diya solikos/solikas. Mi madre diziya “ombre en kaza, dolor de keshada,” porke antes, en el tyempo de muestras nonas, ombres solo lavoravan afuera para ganar pan i kuando se teniyan de kedar en la kaza, estava muy duro para las mujeres porke se aviyan auzados de tener la kaza para eyas. Los ombres komiyan, no gizavan, no alimpyavan, i se keshavan. Agora mujeres i ombres lavoran en la kaza, djuntos. Si no tienen reuniones, todos los dos estan kayados el diya entero. Puedeser ke tienen las oras de komer diferentes. Si no tienen kriyaturas, es un poko mas kolay. Uno arekoje la kaza kuando el otro lavora, uno giza komidas kuando el otro lavora porke agora las oras de lavorar no son del 9 al 7 ama del 9 al 11, o 12 del noche. Investigasyones dizen ke los ke lavoran en kaza tienen manko tiempo para si mismos. Kale ke inchan sus tiempos i mantener el ekilibro de lavoro kon kaza/famiya, apartar sus propyos espasios, separar lavoros de la kaza kon los lavoros del echo.
En 2020, en la epoka del korona “ombres i mujeres en kaza, ay dolor de kavesa.”!
