En estos dias ke estamos pasando en kaza debido a la maldicha hazinura, komo estamos pasando las noches? O partisipando en una de las reunyones zoom, (en pasando kero dizir ke es difisil de eskojer el mas konvenivle entre los montones ke se estan organizando en el mundo entero), o meldando o mirando un filmo en la TV, en la komputadora o Netflix.
La otra semana miri un filmo por la “n” yena vez, Tevye el Lechero, ma esta vez la versyon del anyo 1939 en preto i blanko. Me apersivi ke mankava un personaje muy importante, la kazamentera Yente o Yenta komo se prononsa en Yiddish. En Yiddish kazamentera se yama Shadhan o Shadhen.
Kon la proliferasyon jeneralizada de sitios de kazamenteros o de topaduras en el Internet (I si no me yerro, fin a unos kuantos anyos antes, i en la Turkiya teniyamos una organizasyon semejante), la idea de un shadhan, un/una kazamentero/a, puede verse komo una idea arkaika i primitiva para la mayoria de los djudíos modernos. Ma puedemos dizir ke, un largo tyempo, el shadhan djugo un rolo importante en la vida djudia Ashkenazi o Sefaradi, i en munchos sirkolos tradisyonales, oy en dia esta kontinuando.
Uno o una ke es selibater, o el ke se akodra de su vida antes de enkontrar a su persona spesyal (ke los anglofones yaman "soulmate"), va akseptar ke enkontrar uno o una konvenible, apropradyado para unir su vida "no es fasil". Este sentimyento no es muevo. Sovre este sujeto, desde el tyempo biblikos (i puedeser antes), la djente avlava sovre la difikultad de enkontrar un/a kompanyero/a adekuada. Rabi bar Channah disho al nombre de Rabí Yohanan: “Es tan difísil de unir los kuples, tan difisil komo lo fue la divizyon de la Mar Kolorada” (Talmud, Sanedrín 22a). (En inglez: It is as difficult to match a couple as the splitting of the Red Sea). Sovre el mizmo sujeto, el Midrash (Bereshit Raba, 68:4, Parashat Vayetze) konta la istorya de una matrona romana ke unifiko mil esklavos kon mil esklavas para amostrar ke la unifikasyon matrimonyal no es tan difísil. A la demanyana, el tereno de la matrona paresiya a un espasyo de gerra, un esklavo teniya una pacha rompida, otro un ojo degoyado, un otro kon una kavesa en sangre… La majoridad feridos o maltratados, todos los esklavos i esklavas vinyeron delantre de la matrona para suplikarla ke los libere de sus djuras matrimonyales!
Una de las fonksyones importantes de un/a shadhan es de estrechar el kampo del djugo. Despues de munchas entrevistas, el shadhan tyene una buena idea de lo ke un ombre puede estar bushkando i le puede konsejar muchachas ke kumplan estos kriteryos. (En los derredores mas tradisyonales, los kriteryos los establesen los padres). Un shadhan tambyen entra a la shena para giar las primeras entrevistas por ke los kuples se konoskan, para ayudarlos a ver las mijores kualidades del otro.
Achakes ke el shadhan fasilita un evento tan importante en la vida de una persona (a saver el matrimonyo), se konsidera apropyado pagarle al shadhan por su tyempo i esfuerso. A lo manko, se deve dar al kazamentero/a un regalo sinyifikativo. I es ansi ke “kazamentar” se izo una profesyon!
