La noche de Shabbat, kuando el muevo prezidente de los Estados Unidos remersyo la nasyon en su diskorso de viktorya, su mueva ermuera aparesyo kon la famiya de Biden en la shena en Wilmington, Delaware.
Melissa Kohen, de Johannesburgo, se kazo el anyo pasado kon el ijo de Joe Biden, Hunter, una semana despues ke se konosyeron.
Hunter Biden disho al New Yorker ke despues de la seremoniya en su chiko apartamento en Los Angeles, el le telefono al padre i le disho ke se kazaron. Joe Biden le disho a Melissa: "Te rengrasyo por darle a mi ijo la valor de amar de muevo".
Segun las novelas, el inyeto de Biden tyene syete mezes i se yama Beau, a la onor del ermano de Hunter Biden, ke muryo de kanser serebral en el anyo 2015.
Ken es Melissa Batya Kohen?
Melissa Batya Kohen fue adoptada por una famiya judiya konservativa de Johannesburgo, Lee i Zoe Cohen. Melissa es la mas chika de kuatro ermanos i la sola ijika de la famiya. Kuando se ambezaron el pasado problematiko de sus muevo yerno Hunter, la famiya Kohen no estuvyeron muy kontentes.
Melissa eskrivyo en el internet ke eya fue engrandesida por una mujer de un tribu ke la estuvo yevando munchas vezes a su tyerra natal de Transkei, en el Kabo Oryental de Sudafrika. Melissa disho ke eya se ambezo el inglez kuando teniya sesh anyos. Su lingua maternal es el xhosa, un dialekto tribal.
Melissa Kohen estudyo en David High School i despues en la Universidad de Johannesburgo: Mas despues se enrejistro al Greenside Design Center College of Design, de ande resivyo una kalifikasyon en dizenyo de enteryores.
Melissa se fue a los Estados Unidos kuando teniya ventiun anyo, para azer un kurso de jardinera en Los Angeles, ande lo konosyo a su primer marido, Jason Landver, un empresaryo lokal. Se kazaron kon una seremoniya en 2012, ma se kitaron despues de dos anyos.
Melissa viyajo a Bali, Evropa i Afrika en los ultimos anyos, i eskapo su viyaje vijitando Himba (la djente lokal) en Namibia.
Mas despues peno para azer un dokumentario kon el nombre "Mundos tribales", ke iva eksplorar el pasado, el prezente i el futuro de la umanidad kontados por las komunidades tribales afrikanas. Ma, para pueder azer esto, no reusho a arekojer bastante moneda.
Garyn Kohen, su ermano disho ke su ermana es una “defensora de la konservasyon de la natura i del medyo ambiente, i de las personas nesesitadas en el mundo entero. Eya es verdaderamente notable, entelijente i tyene una neshama (alma) espesyal.
Melissa tyene un tatoo de la palavra "Shalom" o "Paz" en ebreo en su braso. Antes de la boda, Hunter se izo el mezmo tatoo.
