Esta semana fiestamos la fiesta de Hanuka. La fiesta de Hanuka es en mizmo tiempo la fiesta de las luzes “Hag Urim”. En este mez de Disiembre, ke es el mez mas areskuro del anyo, las luzes de las hanukiyas mos arelumbran los korasones i aklaresen las kazas.
Un ijiko biviya en Israel kon sus ermanikos i su famiya. El padre lavorava como injenyor en una sosyeta de “high tech”. Un diya la sosyeta mando al injenyor por unos kuantos anyos en los Estados Unidos para eksperimentarse. Siguro la famiya entera tuvieron ke moversen a los Estados Unidos.
Akel anyo la fiesta de Hanuka koensido kon la fiesta de Noel de los kristianos. En los payizes kristianos la fiesta de Noel es muy alegre. Todos los arvoles, las kazas, las kayes, los magazenes se dekoran kon luzes i flores de kolores a kolores. Las vitrinas meten mil i un djugete i inyeve artifisiala. Las patiseriyas azen munchos biskochos, kekes, gatos kon dekorasyon de Santa Klaus ke es Noel Baba.
Este ijiko vido esto todo por la primera vez en su vida. Una noche ke salyeron a kaminar, se penso: Ke ermoza fiesta ke tienen los kristyanos, mientras ke mozotros tenemos una sola menorayka kon luzes flakas. No arelumbran ansina. Ke pekado. En supito se amataron las luzes de akeya sivdad i todo el entorno se izo preto i areskuro. Ma ensupito se ampesaron a ver las menoras ke estavan asendidas en las ventanas. Una por aki una por aya. Se viyan kon sira las menoras asendidas ke estavan arelumbrando el entorno. Estas luzes no estavan del todo flakas. Estavan briyando komo estreyas. Akel tiempo el ijiko estuvo orgulyozo kon su menora. Vido ke mizmo esta toda esplendor se puede amatar en supito, i las luzes flakas pueden ser igualmente briyante.
La luz fue siempre muy emportante para la umanita. La oskuridad siempre aze espantar. En lo areskuro no savemos lo ke ay en muestro entorno i no puedemos protejarmos si ay alguna sekana.
La luz tambien es el simbolo del saverisyo i de la liberasyon del meoyo en la filozofiya. Lo yaman “El pensamyento libero”. Ansina ampesa la liberta de eksprimarse en las demokrasiyas modernas.
En la Evropa el 18en siglo fue yamado “El siglo de las luzes”. Los mas grandes filozofes komo Montesquieu i Jean Jacques Rousseau bivieron en esta epoka.
Arogaremos al Dio para ke siempre mos aklare los korasones kon la luz de kada kandelika de las Hanukiyas. Amen!
