Unos kuantos dias antes se anunsyo el akordo de rekonosimyento mutual entre Israel i Marocco. En esta okazyon vos kije dar unos kuantos puntos remarkavles sovre la istorya de los Djudios en Marocco.
Los djudios estan bivyendo en Marocco durante miles de anyos. Las tribus nomadas djudias se integraron en todos los aspektos de la vida marokana afilu antes de la konkista muzulmana de Marocco, ke se realizo en el siglo VII.
Si bien ke la vida debasho la dominasyon muzulmana fue relativamente stavle, uvo munchos kavzos de persekusyon. En syertas okazyones, los djudios se toparon ovligados a bivir en los mellahes (rejyones similares a los getos europeos), deviyan de pagar dasyos spesyales i se les egzijo de vistir sinyos identifikativos de djudaizmo. I esto no es una lista entera. Uvo munchos kavzos de atakos i matansinas individuales o en jeneral organizados o por el puevlo o por el governo.
Ma, en los tyempos de la Enkizisyon Espanyola, los bodres norteafrikana fueron un lugar de abrigo importante para los djudios espanyoles persekutidos, lo ke provoko una pujita muy importante de la povlasyon djudia de Marocco. En este tyempo, los antiguos kolones marokanos fueron klasifikados komo toshavim (rezidentes) myentres ke los muevos arrivados fueron yamados m'gorashim (refujyados). Estos avlavan prensipalmente en Espanyol, i los vyejos rezidentes mantenyeron la lingua judeo-arabo.
El destino de la komunidad djudia dependiya en grande parte del governante en el poder. Syertos governantes oprimyeron severamente a sus sujetos djudios, myentres ke otros tuvyeron piadad de eyos. Otros mas mantenyeron el status quo.
Durante la istorya de Marocco, uvo djudios ke suvyeron a altas pozisyones en la korte, la mas grande parte de estos sirvyendo komo ambasadores en los paises evropeos. Ma estas reushitas personales no sirvyeron a mejorar las kondisyones de vida para sus ermanos.
Los djudios de Marocco fueron sivdadinos de segunda klasa asta 1864, kuando el Sultan Mohammad IV les konsedyo los mizmos derechos iguales. En este tyempo, Marocco estava fuertamente enfluensado por Fransya (aunke algunos sujetos estavan basho la enfluensya de Espanya). En 1862, se avriyo la primera eskola Alliance Israelite Universelle en Tetuan, en Marocco. La misyon de la Alianza era la emansipasyon del puevlo djudio kon el ayudo de la edukasyon.
La mayor parte del teritoryo marokano se izo protektorado fransez en 1912. Kuando el governo de Vichy kontrolado por los Nazis tomo el poder de la Fransya, el Sultan de Marocco Mohammed V no aksepto de aplikar las leyes antisemitas komo se le aviya ordenado. Ma este sujeto esta areyevando munchas diskusyones porke se save ke syertas leyes fueron aplikadas sin piyadad.
En su apojeo, en la dekada de 1940, la povlasyon djudia de Marocco apanyo los 200.000 almas. Despues de la kreasyon del Estado de Israel en 1948, los djudios de Marocco devyeron afrontar varios atakos violentos. Dyezes de miles de djudios marokanos se mudaron a Israel i aunke las organizasyones sionistas enkorajaron aktivamente la Aliyah, munchos djudios optaron por kedarse.
El 18 de noviembre de 1956, Marocco eskapo la protektora i se separo de la Fransya. Los djudios ke kedaron kontinuaron a bivir en paz, afilu syertos se izyeron myembros del Parlamento. Ma, el diskordo entre djudios i arabos empeso a pujar despues de la Gerra de los Sesh Dias de 1967. En kada dia, mas djudios emigraron, i oy en dia kedo solo algunas 2.100 almas. Otro punto enteresante, Andre Azoulay, un djudio marokano, era el principal konsejero del Rey Hasan II i oy tyene el mismo posto kon el ijo, el Rey Muhammed VI.
