“Un temps pour changer” en fransez / “Retorniamo a sognare” en italiano (Titolos del livro del Papa Francisco)
Un dia estava sigiendo el kanal fransez TV5, el program de la manyana “télé-matin”. Izieron la reklam de este livro donde el titolo en fransez es “Un temps pour changer”. Este titolo me entrigo i empesi a bushkar el sujeto de este livro. El Papa konta ke tuvo 3 periodas de “Covid” en su vida i kada una le ayudo a formar su personalidad i su vizion.
El primer “Covid” fue a 21 anyo kuando tuvo una enfermedad muy grave, ke kaji le iva kostar la vida. Durante mezes el no supo ken era, si se estava muriendo o si iva kontinuar a bivir. El dize ke de esta situasion, la primera koza ke se embezo fue: “La limit de la dolor i de la soledad”. Despues ke lo yevaron al ospital, la salvasion fue grasias a dos enfirmieras ke desidieron de doblar la doz ke eskrivyo el doktor. La segunda koza ke se embezo fue: “A vezes, los ayudantes son mas atentivos de sus maestros”. “En el ospital venian munchos vijitantes, ma avlavan palavras vaziyas ke no me tokavan el korason. Ma un dia vino una, me detuvo la mano sin dizirme nada. Esto me toko profundamente al korazon”. De esta eksperiensa se ambezo ke: “No devemos avlar muncho, ma devemos topar las palavras ke se nesesitan en akel momento. Yo tomi mi lision i fista oy konto las palavras ke salen de mi boka”.
En 1986, el se fue a estudiar a la Alemanya. El konta ke esto fue el segundo “Covid” para el, porke arankado de sus raises i de su pais adorado, la Argentina, el se sintia muy solo. La djente era aleshada i no amigable del todo. Esta fue para el una perioda de dolor interior i una destabilizasion, ke le ensenyo a valorizar lo ke desho detras.
El treser “Covid” fue, los dos anyos ke paso en Cordoba, en la rezidensia de los Jesuitas. No saliendo afuera de la rezidensia i estando leshos de su famia, estava developando ideas muevas. Konsentrado en su propria persona, empeso a sentir en si, una purifikasion i una kapasitad de pardonar. Entendio ke las kozas importantes tenian menester de tiempo i ke la pasensia es muy valoroza. El dize ke en este profundo developamiento “konklui ke si sufres muncho i te deshas transformar, ganas de ser una mijor persona”.
Lo ke me entereso es ke, el Papa publiko su livro djusto en el momento de esta kriza sanitaria del “Covid”, ke konserna el mundo entero. El es un ombre spesial ke le plaze sonyar, para yegar i konstruir un mundo mijor. Su dezeo es, meter la planeta en el sentro de un nuevo pensamiento. El no se inspira solo de los tekstos sagrados, ma tambien de los deskuvrimientos de sientifikos, ekonomistos, aktivistas i otros pensadores. A parte de ser Papa, el se siente el derecho de adresarse a todos los umanos i avlar sovre todos los problemas mundiales. El es un ombre aktual de 83 anyos, un Papa “avantgarde” ke mira siempre al horizonte i se siente el dever de traer una djustisia al mundo.
El modo de vista del Papa, me izo azer un paralelizmo kon muestra fraze de la Mishna “TIKUN OLAM” ke sinyifika “REPARAR EL MUNDO”. Es una responsabilidad ke se dio a los judios, para ke pensen no solo a sus proprio moral i benefisio material, ma en mismo tiempo para ke sean responsables del bienestado de la sosiedad en jeneral.
Tikun Olam se puede entender komo una filozofia de vida de algunas personas ke dezean deshar una chika kontribusion al mundo, aziendo servisio sosial, mostrando interes por la umanidad i komportandose kon buendad, empatia i solidaridad. Keren ke sus komportos asi, sean egzemplos para munchos i ke puedan trokar sus mentalidades de krueledad i de egoizmo.
"Un temps pour changer” es el titolo ke me konvinio i ke me arepusho a investigar sovre el livro del Papa Francisco i mi traduksion al ladino fue “Tiempo para trokar”. Mozotros, la jenerasion ke vido el siglo 20 i 21 fuimos muy mazalozos. Todo adelanto muy presto. Lo ke no vido la umanidad desde su kreasion, se realizo en una perioda muy kurta i fuimos los shaetes. Filozofikamente se puede pensar ke el mundo nesesita de repozarse, de tomar un reflo, de meditar, para konsentrarse a ser mas perfekto i mas igual. Puedemos tambien akseptar el “Covid” komo un freno ke ayuda la planeta kansada, a ir mas lento, i asi se pueden kalmar los sielos, las tierras, las mares i tornarsen a sus orijines.
