Kuando se Dezaparese la Syensa, se Dezaparese la Valor del Benadam
Vos konsejo un filmo ermozo sovre la sensia, sovre produzir la kultura. El filmo se yama Agora. https://www.filmmodu.org/agora-turkce-dublaj-izle El direktor es Alejandro Amenabar (Espana, 2009). Es la istoria de Hypatia (370-415). Mos konta el sistem del penserio, los karakteres de akel siglo, la forma de la komunidad. El filmo esta pasando en Aleksandria. La mas grande biblioteka del mundo ke inkluyia livros eskritos de mano mas de 900.000, en el siglo Antiguo. El direktor de la biblioteka es el matematiko Theon. El engrandesyo a su ija Hypatia, debasho del tejado de kultura, djustamente komo una mujer de sensia. Una savya perfekta. Le embezo saveduria, si no es provado no es provecho. No kale akseptar sin pensar. Theon siempre le disho a su ija ke tiene derecho a sus ideas, ke no se espante nunka de pensar yerrado. Pensar yerrado es mas bueno de no pensar nada. Hypatia es filosofa, matematika i astronoma. Sin apartar a dingunos, dio lesones a los Paganos, a los Djudios, i a los Kristianos.
En el filmo estamos viendo komo se derroko la sivdad i komo se kemo la biblioteka kon todos los livros. Los direktores de la komunidad para profitos suyos, enflamaron el puevlo, kon el ayudo de kuatro kreensas diferentes. Estas kreensas ariento de la intoleransya, el prejuisyo, no akseptar al otro i por fin las fuersas politikas, kruelas, sin piyadad, kon negriguras estavan kemando al puevlo, estavan degoyando i piyedregando. Hypatia era una echizera en los ojos de eyos porke saviya la ley.
Ken son estos kuatro grupos. El uno es ke kree al kriador grande, i es patron de la fey. El segundo es las personas ke azen despareser a los ke no paresen a el. Estos son los ke kemaron tantos livros, i aryento de la biblioteka mantuvyeron kodreros. Esto es un metafora grande. Si no ay livros, toma el lugar kodreros. Otrun grupo komo Orestes, un karakter del filmo, para su profito estava pretendiendo ser Kristyano. I el kuatren grupo es el ke reprezenta Hypatia. Hypatia dize, yo solo se kestionar. Yo kreo solo en la filosofia. Yo kreo solo en la sensya. Mi sensya es mi Dyo. I por esto estava bushkando a topar el sistema del sol. Komo es el kamino del mundo en el entorno del sol. Diziya, deke no esto puedyendo entender? Diya i noche esto kon los livros i mirando al sielo para entender. I en fin esto es la razon ke me nombraron “echizera”. Aryento de estos pletos es la pozisyon ke toma eya, kon su lojika. Todo su tiempo estava pasando para solusyonar los sekretos del kosmos. Eya keria solo saver, no solo ser una mujer i una madre. I esto es la razon ke el piskopos Kristiano la denunsio komo echizera.
En el filmo ay munchas kozas, munchos detalios psikolojikos i sosyolojikos. Esto es una hazinura ke se ve en todos los siglos, tambien i oy. Esto es una hazinura universal ke enkasha al benadam aryento de la negregura.
Ya savemos kuando se dezaparese la syensa i la lojika, se dezasparese la valor del benadam. El mundo se eskurese.
En otras literaturas topamos munchas istorias sovre Hypatia. El famozo pintor Raphael la desino a Hypatia en el famozo tablo suyo “La Eskola de Atina” i fue menasado por el Papa Julios II. Fue ovligado de trokar el karakter de Hypatia kon el karakter de la sovrina del Papa.
Hypatia oy se konose por sus livros, ma ke no pudyeron vinir fina oy. 13 Volumes de matematika. Komentaryos enriva de “koni”. Los livros de su padre Theon los metyo en regla, Almages de Batlamyus i los Elementos De Oklid. Eskrivyo un livro enriva de las Leyes De Astronomia. Eya aze parte en klasifikar los objektos del syelo i en determinar la konsolidasyon de la agua.
Oy en diya ay una biblioteka mueva en Aleksandria ke se fraguo en 2002.
