Siempre me demandava deke fraguavan kulas en los shatos? Kreyiya ke era para observar el entorno si ay algun enemigo ke esta aserkando. Ma vide ke nunka sirvyo para bueno. Tenemos munchos egzemplos de esto. Por egzemplo, la konseja de Rapunzel. Otro egzemplo es la leyenda de Kız Kulesi. I ken save kuantas mas leyendas avera en el mundo ke fueron aprezadas las mansevikas en estas kulas.
Kualo pensash si vos dizen ke estas dos personas son las mizmas? Oy vos va kontar una istorya triste. Es la istorya de Blanche Monnier ke fue aprezada durante 25 anyos en una shirvane.
Blanche Monnier nasyo en 1849 en Fransya. Era la ija de una famiya rika. Kuando se engrandesyo aviya munchos mansevos ke la keriyan. Ma Blanche keriya bien a un avokato ke era muncho mas grande de eya i se keriya kazarse kon el. La madre de Blanche estava totalmente kontra esta relasyon. Eya pensava ke este avokato no era dinyo de eyos. Le disho a la ija ke si no se va ezvachar de este avokato, la va mandar ande la tiya ke mora en la Amerika. Ma Blanche estava muy desidada i disho a su madre: O akseptash este kazamyento o me fuygo de kaza.
La madre i el ermano de Blanche ya entendieron ke eya estava serioza i no la puedyeron konvenser, la enserraron a la shirvande del shato ande moravan. A todos los konosidos disheron ke Blanche se fuyo de kaza. El avokato la estuvo bushkando en todas las partes. Dingunos no teniya haber de lo ke akontesyo. Mizmo sus amigas no saviyan. Despues de unos kuantos anyos el avokato se muryo misteryosamente en supito. Ansina madre i ijo tomaron un reflo repozado, sus vidas kontinuo al normal.
Povereta Blanche estava biviendo en la shirvane, de los piezes i de las manos atadas, maldizyendo su destino. Djusto 25 anyos no vido luz de bivos.
En el anyo 1901 el Prokurador Jeneral resivyo una letra anonima. En la letra estava eskriviendo: Tengo la onor de darvos una enformasyon muy serioza. En la kaza de Madame Monnier ay una persona enserrada. Desde 25 anyos bive ensima de chopes i su suzyedad.
Kuando entraron los polises a kaza, no se kreyeron de lo ke vieron. La kamareta ande biviya Blanche estava goliendo. En basho kaminavan los guzanos. I Blanche si teniya a penas 25 kilos, estava kuerro i gueso. Pishin fue yevada al ospital. Uno de los polises konto a los jurnalistos ke la mujer estava entera desmuda echada, en el entorno teniya restos de komidas. No pudimos kontinuar muestra investigasyon.
La madre i el ermano fueron metidos a la prezyon. La madre muryo despues de 15 diyas. El ermano fue liberado por razon ke toparon ke era enkapasitado mental.
Blanche Monnier paso sus anyos dalkavo en un sanatoryum i muryo en 1913.
Este evenimyento fue diskutado munchos anyos en Fransya.
Dainda no se save, ken es ke mando esta letra. Asigun una teoriya es Marsel, el ermano de Blanche el ke eskrivio la letra, I a sigun otra es ke fue una de las mosas ke lavoravan en kaza.
