Dora NİYEGO
El 19 Julyo, martes la noche, el grupo Alman "Helmut Eisel Band Music" ke fue envitado por Robert Schild a Büyükada (Prinkipo) para el "Segundo Festival Internasyonal de las Islas de Estambol" , dyo un konserto de muzika Djudia "Klezmer".
Antes kel konserto empese, Robert Schild mos avlo sovre la muzika Klezmer , la kuala es la muzika folklorika de los Ashkenazim ke bivyeron en la Evropa del Este i en la Rusia ,en el dizimueven siglo.
Los oyentes baylaron i kantaron al sono de las baladas, horas, kantikas populares ke los muzisyenes egzekutyeron sovre sus klarineta, akordeon, violin i bateri.
Dos syeklos antes, el violin i la klarineta eran los enstrumentos ke los djudyos eskojian para ekspresar sus alegrias o sus tristezas. Una otra razon por la kuala eyos preferavan la klarineta i el violin era ke eyos eran fasil a yevar de un lugar al otro kuando muestros padres i ermanos eran ekspulsados de sus kazales.
Akeyos dias, las fyestas, bodas i kualkyer otras seremonias, no puedian ser selebradas sin la muzika Klezmer. Los klezmorim no savian ni meldar ni eskrivir, eyos eran los mas, paryentes ke ivan de un kazal al otro para kantar en las bodas.
Oy en dia, los Judyos orijinaryos de Rusia i de la Evropa del Este, ke biven en la Amerika, kontinuan a emplear esta muzika en los radyos, showes i teatros en Yiddish. Los muzisyenes de Jazz (Benny Goodman es uno de entre eyos) fueron enfluensados por la muzika Klezmer.
El Klezmer el mizmo fue enfluensado por las melodias Romanas, Gregas, Bulgaras i Turkas.
El konserto de noche de martes fue una grande festividad para los djudyos de las Islas.
Eyos tuvyeron el grande plazer de oir las melodias de sus avuelos.
